بھارت میں 568 جوڑوں کی اجتماعی شادی کا بھانڈا پھوٹ گیا 2 اہلکار گرفتار
بھارتی میڈیا کے مطابق اجتماعی شادی کے لیے حکومت 51 ہزار روپے فراہم کرتی ہے جس میں سے 35 ہزار روپے لڑکی کو ملتے ہیں جبکہ 10 ہزار روپے شادی کے سامان کی خریداری کے لیے ہوتے ہیں اور 6 ہزار روپے تقریب کے لیے دیے جاتے ہیں۔
ایسی ہی اجتماعی شادی کی تقریب اترپردیش میں 25 جنوری کو رکھی گئی تھی جس میں مودی کی جماعت بھارتیہ جنتا پارٹی کی خاتون رکنِ اسمبلی نے بھی شرکت کی۔
اجتماعی شادی میں فراڈ کا بھانڈا اس وقت پھوٹا جب شادی کی ویڈیوز سوشل میڈیا پر وائرل ہونے لگیں جس میں دلہا اپنا منہ چھپائے ہوئے تھے اور دلہنوں نے خود ہی اپنے گلے میں ہار ڈالے۔
پولیس نے ویڈیوز سے شناخت کرکے دلہا دلہنوں سے رابطہ کیا تو اکثر نے بتایا کہ انھیں سرکاری اہلکاروں نے ایسا کرنے کا کہا تھا اور اس کام کے لیے معاوضہ بھی دیا تھا۔
جس پر پولیس نے 2 سرکاری اہلکاروں سمیت 15 منتظمین کو حراست میں لے کر تفتیش شروع کردی۔