بھارت میں پٹاخے کی فیکٹری میں دھماکا اور آتشزدگی سے درجن کے قریب ہلاکتیں

فوٹو انٹرنیٹ

---

بھارتی ریاست مدھیا پردیش کے ضلع ہردا کے علاقے بیرا گڑھ میں پٹاخے کی فیکٹری میں ہونے والے دھماکے کے نتیجے میں 11 افراد ہلاک جبکہ 200 سے زائد زخمی ہوگئے۔

بھارتی میڈیا کے مطابق ریاست مدھیا پردیش میں قائم غیر قانونی پٹاخوں کی فیکٹری میں منگل کی صبح دھماکا ہوا جس کے نتیجے میں فیکٹری اور اطراف میں قائم 100 سے زائد مکانات متاثر ہوئے۔

حکام کے مطابق دھماکے کے نتیجے میں 60 مکانات مکمل تباہ ہوگئے جبکہ تین درجن سے زائد شہری زخمی ہوئے ہیں۔

فیکٹری میں آتشزدگی کے بعد وقفے وقفے سے مسلسل دھماکوں کی آوازیں آرہی ہیں جس پر حکام نے اطراف سے 100 سے زائد مکانات کو خالی کرالیا ہے۔

میڈیا رپورٹ کے مطابق دھماکے کے بعد بڑی تعداد میں موٹرسائیکلوں اور گاڑیاں بھی نذر آتش ہوگئیں۔

وزیر اعلیٰ نے واقعے کا نوٹس لے کر متعلقہ حکام کو امدادی کام فوری مکمل کرنے کی ہدایت کرتے ہوئے رپورٹ طلب کرلی ہے جبکہ اطراف میں لگی آگ بجھانے کیلیے فائر برییگیڈ کی گاڑیاں بھی موقع پر موجود ہیں۔

بھارتی میڈیا کے مطابق اطراف کے گھروں سے 170 سے زائد شہریوں کو ریسکیو کر کے اسپتال منتقل کیا گیا جن میں سے 140 زخمی تھے۔ حکام نے صورت حال کے پیش نظر اموات میں اضافے کا خدشہ بھی ظاہر کیا ہے۔