صائم ایوب نے رضوان کی طرف دیئے گئے ’’سپر اسٹار‘‘ کے لیبل کو مسترد کردیا

کیرئیر میں ابتدائی ناکامیوں نے مجھے بہت کچھ سکھایا، صائم ایوب (فوٹو: ایکسپریس ویب)

---

قومی کرکٹ ٹیم کے نوجوان اوپنر صائم ایوب نے وکٹ کیپر بیٹر محمد رضوان کی جانب سے دیئے جانے والے ''سپر اسٹار'' کے لیبل کو مسترد کردیا۔

کرک انفو کو دیئے گئے انٹرویو میں نوجوان اوپنر صائم ایوب نے کہا کہ دورہ نیوزی لینڈ اور بنگلہ دیش پریمئیر لیگ میں ناکامیوں نے مجھے بہت کچھ سکھایا، مجھے اپنے کھیل کو بہت بہتر کرنے کی ضرورت ہے۔

انہوں نے کہا کہ ابتدائی مراحل میں ناکامیاں ملنے پر اُداس نہیں بلکہ خوش ہوں تاکہ بہتر کرکٹر بن کر ٹیم میں واپس آؤں، اب میں جانتا ہوں کہ مجھے کس معیار تک پہنچنا ہے۔

مزید پڑھیں: رضوان نے ٹیم ڈائریکٹر محمد حفیظ سے متعلق اہم انکشافات کردیئے

صائم ایوب نے کہا کہ بنیادی ہدف ٹیسٹ کرکٹ کھیلنا ہے، جو میری صلاحیتوں میں نکھار پیدا کرسکتا ہے۔

قبل ازیں بنگلہ دیش پریمئیر لیگ کے دوران محمد رضوان نے نوجوان اوپنر کے حوالے سے کہا تھا کہ "لیگز ہمیشہ نوجوان کھلاڑیوں کی مدد کرتی ہیں، ہم سمجھتے ہیں کہ صائم ایوب پاکستان کے اگلے سپر اسٹار ہیں "۔

مزید پڑھیں: رضوان نے بابراعظم کیساتھ اوپننگ جوڑی ٹوٹنے پر لب کشائی کردی

واضح رہے کہ دوردنتو ڈھاکہ کیلئے صائم ایوب کی کارکردگی توقعات سے کم رہی وہ محض 5 میچوں میں 15.40 کی اوسط سے 77 رنز بناسکے تھے۔