کنگنا رناوت ہدایتکارہ ریما کاتگی کی فلم میں سیف کی ہیروئن بنیں گی

لاہور:
بالی ووڈ اداکارہ کنگنا رناوت کی حال ہی میں ریلیز ہونے والی فلم ریوالور رانی باکس آفس پر اتنی کامیاب نہیں جاسکی جس کی امید تھی لیکن اس کے باوجود کنگنا کی مقبولیت اور ڈیمانڈ میں کوئی کمی نہیں ہوئی اور اے فلم تلاش کی ہدایتکارہ ریما کاتگی نے اپنی آنیوالی فلم میں سیف علی خان کے ساتھ کاسٹ کرنے کا فیصلہ کرلیا ہے۔


اطلاعات کے مطابق اداکارہ کے اسکرپٹ رائٹنگ کورس کی تکیمل کے لیے نیویارک روانگی سے قبل ریما کاتگی نے اس سے ایک طویل ملاقات کی جس دوران فلم کے متعلق گفتگو کی گئی۔ اس موقع پر اداکارہ جو سوجے گھوش کی فلم درگا رانی سنگھ میں کام کرنے سے انکار کرچکی ہیں کو فلم کا آئیڈیا پسند آیا ہے اور انھوں نے رسمی طور پر کام کرنے پر آمادگی کا اظہار کردیا ہے تاہم وہ حتمی طور پر آمادگی کا اظہار نیویارک سے واپس بھارت آنے پر ہی کریں گی۔

اطلاعات کے مطابق فلم جس کا ابھی نام نہیں رکھا گیا فرحان اختر، رتیش شدھوانی کی مشترکہ پروڈکشن میں ایکسل انٹرٹینمٹ کے بینر تلے بنائی جائے گی سیف علی خان تیرہ برس کے بعد اس بینر تلے کام کریں گے جب کہ کنگنا کے لیے یہ پہلا موقع ہوگا کہ وہ سیف علی خان کے ساتھ کسی فلم میں نظر آئیں گی۔