پاکستان مسلم لیگ ن میں قومی کے ایک اور پنجاب اسمبلی کے مزید 6 ارکان شامل

نامزد وزیراعلیٰ پنجاب مریم نواز سے آزاد امیدواروں نے ملاقات کی—فوٹو: ایکسپریس نیوز

---

پاکستان مسلم لیگ(ن) میں آزاد حیثیت میں جیتنے والے امیدواروں کی شمولیت کا سلسلہ جاری ہے جہاں قومی اسمبلی کے ایک اور پنجاب اسمبلی کے مزید 6 آزاد اراکین نے شمولیت کا اعلان کیا۔

پاکستان مسلم لیگ (ن) کی سینئر نائب صدر اور نامزد وزیراعلیٰ پنجاب مریم نواز سے آزاد حیثیت میں کامیابی حاصل کرنے والے اراکین نے ملاقات کی اور اس موقع پر مسلم لیگ(ن) پنجاب کے صدر رانا ثنااللہ بھی موجود تھے۔

مسلم لیگ (ن) میں شمولیت اختیار کرنے والے آزاد اراکین میں قومی اسمبلی کے حلقہ این اے-92 بھکر سے جیتنے والے رشید اکبر نوانی، پی پی-90 بھکر سے احمد نواز نوانی، پی پی-92 اور 93 بھکر سے کامیاب عامر عنایت شاہانی اور پی پی-272 مظفر گڑھ سے جیتنے والے رانا عبدالمنان شامل ہیں۔

اسی طرح پی پی- 205 خانیوال سے اکبر حیات ہراج اور پی پی-212 خانیوال سے اصغر حیات ہراج نے بھی مسلم لیگ (ن) میں شامل ہونے کا اعلان کیا۔

نامزد وزیر اعلیٰ پنجاب مریم نواز شریف سے ملاقات کے دوران رشید اکبر نوانی، احمد نواز نوانی، عامر عنایت شاہانی، رانا عبدالمنان، اکبر حیات ہراج اور اصغر حیات ہراج نے نواز شریف کی قیادت پر مکمل اعتماد کا اظہار کیا۔

مریم نواز نے آزاد ارکان کی مسلم لیگ (ن) میں شمولیت کا خیرمقدم کیا اور اس فیصلے پر انہیں مبارک باد دی۔

آزادحیثیت میں منتخب ہونے والے اراکین اسمبلی نے کہا کہ قائد نواز شریف، شہباز شریف اور پاکستان مسلم لیگ (ن) کی پاکستان، عوام اور پنجاب کے لیے خدمات تاریخی ہیں، پاکستان کو مسائل سے نکالنے کی صلاحیت اور قابل عمل ایجنڈا صرف مسلم لیگ (ن) کے پاس ہے۔

انہوں نے کہا کہ اپنے حلقے کے عوام اور سپورٹرز کی مشاورت سے مسلم لیگ (ن) میں شامل ہونے کا فیصلہ کیا۔

مریم نواز شریف نے آزاد ارکان اسمبلی سے گفتگو میں کہا کہ آپ کے جذبے اور قومی سوچ کی قدر کرتے ہیں، آپ نے تعمیر پاکستان کے قافلے میں شمولیت اختیار کی ہے، آپ کی حمایت پاکستان اور عوام کو مشکلات سے نکالنے میں بڑی مددگار ہوگی۔

نامزد وزیراعلیٰ پنجاب نے کہا کہ ہمارے لیے اقتدار نہیں، ملک اور عوام کی خدمت اہم ہے، نواز شریف پاکستان کو انتشار سے بچانے اور متحد کرنے والی قوت کا نام ہے، نواز شریف آج بھی پاکستان جبکہ مخالفین اپنی ذات کی بات کر رہے ہیں۔

مریم نواز کا کہنا تھا کہ پاکستان کو انتشار نہیں، استحکام چاہیے، انتشار پھیلانے والے آج بھی انتشار ہی پھیلا رہے ہیں کیونکہ ان کا ایجنڈا ہی انتشار ہے، انتشار کا نشانہ پاکستان اور اس کے ادارے ہیں۔

انہوں نے کہا کہ پنجاب کے عوام نے ہمیں مینڈیٹ دیا، ان شااللہ ان کی خدمت کا حق ادا کریں گے اور پنجاب کو ترقی کی مثال بنائیں گے، پاکستان کو بچانے کے لیے ایک لاکھ بار بھی سیاسی مفاد قربان کرنا پڑا تو کریں گے، وطن پر جان بھی قربان ہے۔