انوشکا اور کوہلی کے دوسرے بچے کی پیدائش لندن میں ہونے کی خبریں گرم

ویرات کوہلی اور انوشکا شرما 2017 میں شادی کے بندھن میں بندھے تھے : فوٹو : فائل

---

بالی ووڈ اسٹار انوشکا شرما اور بھارتی کرکٹر ویرات کوہلی سے متعلق یہ خبر سامنے آئی ہے کہ اس جوڑی کے دوسرے بچے کی پیدائش بھارت کے بجائے لندن میں ہوگی۔

بھارتی میڈیا کے مطابق بزنس مین ہرش گوئنکا نے سماجی رابطے کی ویب سائٹ ایکس (سابق ٹوئٹر) پر انوشکا شرما اور ویرات کوہلی کے دوسرے بچے کی پیدائش سے متعلق پوسٹ کرکے تہلکہ مچا دیا۔

ہرش گوئنکا نے اپنی پوسٹ میں کہا کہ اگلے چند دنوں میں ایک بچے کی پیدائش ہونے والی ہے، اب دیکھنا یہ ہے کہ وہ بچہ اپنے والد کی طرح کرکٹر بنے گا یا پھر اپنی والدہ کے نقش قدم پر چلتے ہوئے فلم اسٹار بنے گا۔

مزید پڑھیں: ڈی ویلیئرز کا یوٹرن، انوشکا اور کوہلی کے ہاں دوسرے بچے کی آمد کی تردید

بھارتی بزنس مین نے اپنی پوسٹ میں یہ انکشاف بھی کیا کہ انوشکا شرما اور ویرات کوہلی کے دوسرے بچے کی پیدائش لندن میں ہوگی۔

ہرش گوئنکا نے اپنی پوسٹ میں انوشکا شرما اور ویرات کوہلی کا نام نہیں لیا لیکن اُنہوں نے ڈھکے چھپے الفاظ میں اشارہ دے دیا ہے کہ یہ جوڑی بہت جلد لندن میں اپنے دوسرے بچے کو خوش آمدید کہنے والی ہے۔

A new baby is to be born in the next few days! Hope the baby takes India to great heights like the greatest cricketing father. Or will it follow the mother and be a film star? #MadeInIndia #ToBeBornInLondon

- Harsh Goenka (@hvgoenka) February 13, 2024

واضح رہے کہ گزشتہ دنوں جنوبی افریقا کے سابق کپتان اے بی ڈی ویلیئرز نے اپنے یوٹیوب چینل پر انکشاف کیا تھا کہ ویرات کوہلی اور انوشکا شرما کے ہاں دوسرے بچے کی پیدائش متوقع ہے اس لیے بھارتی بلے باز نے اپنی اہلیہ کو وقت دینے کیلئے انگلینڈ کیخلاف ٹیسٹ میچز سے وقفہ لیا ہے۔

اس انکشاف کے بعد اے بی ڈی ویلیئرز نے شاندار یوٹرن لیتے ہوئے اس خبر کی تردید کرتے ہوئے کہا تھا کہ اُن سے غلطی ہوگئی ہے، ویرات کوہلی اور انوشکا شرما کے دوسرے بچے کی توقع کی خبر درست نہیں ہے۔

مزید پڑھیں: اے بی ڈی ویلیئرز نے انوشکا شرما اور ویرات کوہلی سے معافی مانگ لی

یاد رہے کہ ستمبر 2023 میں بھارتی میڈیا کی جانب سے یہ دعویٰ کیا گیا تھا کہ انوشکا شرما اپنے دوسرے بچے کی توقع کر رہی ہے، اُنہیں اپنے شوہر ویرات کوہلی کے ہمراہ ممبئی کی ایک میٹرنٹی کلینک میں دیکھا گیا تھا۔

ویرات کوہلی اور انوشکا شرما 2017 میں شادی کے بندھن میں بندھے تھے۔ اسٹار جوڑے کے ہاں جنوری 2021 میں بیٹی کی پیدائش ہوئی تھی جس کا نام اُنہوں نے وامیکا رکھا تھا۔