پی ایس ایل 9 کی افتتاحی تقریب میں علی ظفر کی دھوم

پی ایس ایل 9 کی افتتاحی تقریب میں علی ظفر کی واپسی پر شائقین کرکٹ خوشی سے نہال ہوگئے ہیں

ویب ڈیسک February 18, 2024

علی ظفر نے اپنے تمام "پی ایس ایل ترانوں" کو شاندار انداز میں شائقین کرکٹ کے سامنے پیش کیا (فوٹو : پی سی بی)

پاکستان کرکٹ کے میگا ایونٹ پاکستان سُپر لیگ (پی ایس ایل) کے سیزن 9 کی رنگا رنگ افتتاحی تقریب میں معروف گلوکار علی ظفر کی شاندار پرفارمنس نے دھوم مچا دی۔

17 فروری کو لاہور کے قذافی اسٹیڈیم میں ایچ بی ایل پی ایس ایل 9 کی افتتاحی تقریب کا انعقاد کیا گیا جس میں گلوکار علی ظفر، آئمہ بیگ، نتاشہ بیگ اور عارف لوہار سمیت دیگر فنکاروں نے اپنے فن کا مظاہرہ کیا لیکن اس تقریب میں سب سے زیادہ چرچے علی ظفر کی زبردست پرفارمنس کے ہوئے جنہوں نے اپنے تمام "پی ایس ایل ترانوں" کو شاندار انداز میں ایک بار پھر شائقین کرکٹ کے سامنے پیش کیا۔

علی ظفر نے اپنی پرفارمنس کا آغاز کرتے ہوئے پی ایس ایل کے پہلے ایڈیشن کا آفیشل ترانہ "اب کھیل کے دکھا" گایا، اس کے بعد گلوکار نے پی ایس ایل 2 کا آفیشل ترانہ "اب کھیل جمے گا" شائقین کرکٹ کے سامنے پیش کیا جس کی دُھن میں شائقین جھومتے نظر آئے۔

مزید پڑھیں: ایچ بی ایل PSL9 کی رنگا رنگ افتتاحی تقریب، فنکاروں کی شاندار پرفارمنس

گلوکار نے اپنی پرفارمنس کو آگے بڑھاتے ہوئے پی ایس ایل کے تیسرے ایڈیشن کا آفیشل ترانہ "دل سے جان لگا دے" پر پرفارم کیا اور آخر میں اُنہوں نے گلوکارہ آئمہ بیگ کے ساتھ ملکر پی ایس ایل 9 کے آفیشل ترانے "کُھل کر کھیل"پر اپنے شاندار فن کا مظاہرہ کیا۔

پی ایس ایل 9 کی افتتاحی تقریب میں علی ظفر کی واپسی پر شائقین کرکٹ خوشی سے نہال ہوگئے اور سوشل میڈیا پر گلوکار کی تعریفیں کرتے ہوئے اپنے جذبات کا اظہار کرتے نظر آئے۔

View this post on Instagram

A post shared by Pakistan Super League (@thepsl)

واضح رہے کہ ایچ بی ایل پی ایس ایل 9 کی افتتاحی تقریب کے اختتام پر شاندار آتش بازی نے سماں باندھ دیا جبکہ تقریب کے دوران لیزر شو کا بھی مظاہرہ کیا گیا۔