کراچی میں کوکنگ آئل سے بھرا ٹینکرالٹنے سے ہزاروں لیٹرتیل سڑک پربہہ گیا

حادثے کے فوری بعد علاقہ مکینوں نے پلاسٹک کے ڈرم میں سڑک پر بہنے والے تیل کو جمع کرنا شروع کردیا۔

Staff Reporter February 18, 2024

حادثے کے فوری بعد علاقہ مکینوں نے پلاسٹک کے ڈرم میں سڑک پر بہنے والے تیل کو جمع کرنا شروع کردیا۔

کورنگی صنعتی ایریا ویٹا چورنگی کے قریب خوردنی تیل سے بھرا ٹینکرالٹنے سے ہزاروں لیٹرتیل سڑک پربہہ گیا۔

اتوارکی صبح کورنگی صنعتی ایریا تھانے کے علاقے ویٹا چورنگی کے قریب ٹینکرالٹنے کی وجہ سے خوردنی تیل سڑک پربہنا شروع ہوگیا جس کے باعث ٹریفک کی روانی متاثرہوگئی۔

حادثے کے فوری بعد علاقہ مکین بڑی تعداد میں موقع پر جمع ہو گئے اور پلاسٹک کے ڈرم سمیت دیگر برتنوں میں سڑک پر بہنے والے تیل کو جمع کرنا شروع کردیا۔

علاقہ پولیس اور ٹریفک پولیس موقع پر پہنچ گئی اور علاقہ مکینوں کو منتشر کرتے ہوئے ٹینکرکو گھیرے میں لے لیا۔

پولیس کے مطابق حادثہ ویٹا چورنگی کے قریب چورنگی کراس کرتے ہوئے واٹرٹینکر اورآئل ٹینکرآپس میں ٹکرانے کے باعث پیش آیا۔ واٹر ٹینکر محفوظ رہا جبکہ آئل ٹینکر سڑک پر الٹ گیا جس کے نتیجے میں ہزاروں لیٹر خوردنی تیل سڑک پر بہہ گیا۔

حادثے میں آئل ٹینکرڈرائیوراورکلینر محفوظ رہے۔ ٹریفک پولیس نے کرین کی مدد سے ٹینکرکوسڑک سے ہٹا دیا اورسڑک پر مٹی کے کئی ڈمپر ڈال کر خشک کیا گیا تاکہ گاڑیاں اور موٹر سائیکلیں کسی حادثے کا شکارہونے سے بچ سکیں ۔