ٹانک میں ری پولنگ کے دوران پولیس پر فائرنگ پولنگ روک دی گئی

این اے 43 کے 6 پولنگ اسٹیشنز پر 8 فروری کے روز شدت پسندوں کے حملوں کی وجہ سے پولنگ نہیں ہوسکی تھی۔

ویب ڈیسک February 19, 2024

این اے 43 کے 6 پولنگ اسٹیشنز پر 8 فروری کے روز شدت پسندوں کے حملوں کی وجہ سے پولنگ نہیں ہوسکی تھی۔

خیبر پختونخوا کے ضلع ٹانک کے علاقے کوٹ اعظم میں پولنگ اسٹیشن کے باہر پولیس بکتر بند گاڑی پر نامعلوم افراد نے فائرنگ کردی، تاہم پولیس کی جوابی کارروائی میں 2 حملہ آور ہلاک ہوگئے۔

پولیس ذرائع کے مطابق واقعے کے بعد پولنگ کا عمل روک دیا گیا ہے۔ کئی علاقوں میں بجلی کی ترسیل بھی کئی گھنٹوں سے بند ہے جس سے انتخابی عملے کو شدید مشکلات کا سامنا ہے۔

این اے 43 کے 6 پولنگ اسٹیشنز پر الیکشن ٹربیونل کے فیصلے کے بعد آج 19 فروری کو پولنگ کی جارہی ہے۔ آزاد امیدوار داور کنڈی کو کامیاب قرار دینے کے بعد مفتی اسعد محمود نے ری پولنگ کی اپیل کی تھی۔

کوٹ اعظم اور دیگر علاقوں میں این اے 43 کے 6 پولنگ اسٹیشنز پر 8 فروری کے روز شدت پسندوں کے حملوں کی وجہ سے پولنگ نہیں ہوسکی تھی۔

8 فروری کے الیکشن میں پی ٹی آئی کے حمایت یافتہ آزاد امیدوار داور کنڈی کو کامیاب قرار دیا گیا تھا۔ انجینئر داور کنڈی خان کا مقابلہ جے یو آئی کے سربراہ مولانا فضل الرحمان کے فرزند مفتی اسعد محمود کے ساتھ ہے۔ 8 فروری کے الیکشن میں داور کنڈی نے 63556 اور مفتی اسعد 62730 ووٹ حاصل کئے تھے۔

داور کنڈی 826 ووٹوں کی برتری سے جیت گئے تھے۔ مفتی اسعد محمود نے الیکشن ٹربیونل سے نان پولڈ پولنگ اسٹیشنز پر پولنگ کی اپیل کی تھی۔