فلپائن میں ’لوو اسکیم سینٹر‘ سے سیکڑوں یرغمالی بازیاب

فوٹو: صدارتی کمیشن برائے انسداد منظم جرائم فلپائن

---

فلپائن کے ایک لوو اسکیم سینٹر سے سیکڑوں یرغمالیوں کو بازیاب کرالیا گیا۔

غیر ملکی خبر رساں ادارے کے مطابق فلپائن کی پولیس نے جمعرات کو منیلا سے تقریباً 100 کلومیٹر شمال میں واقع ایک اسکیم سینٹر سے سیکڑوں لوگوں کو بازیاب کرایا ہے جہاں پر انہیں آن لائن محبت کے ذریعے دھوکہ دہی پر مجبور کیا جاتا تھا۔ بازیاب ہونے والوں میں 383 فلپائنی، 202 چینی اور 73 دیگر غیر ملکی شہری شامل ہیں۔

منظم جرائم کے خلاف صدارتی کمیشن کے ترجمان ونسٹن کاسیو نے بتایا کہ یہ کارروائی ایک 30 سالہ ویتنامی شخص کی خفیہ اطلاع پر کی گئی جو گزشتہ ماہ یہاں سے فرار ہونے میں کامیاب ہو گیا تھا۔ مذکورہ شخص جنوری میں فلپائن پہنچا تھا جسے یہاں شیف کی نوکری کے بہانے لایا گیا تھا۔

پولیس کے مطابق اسکیم سینٹر میں یرغمال افراد کو ایک جعلی شناخت اپنا کر آن لائن فراڈ پر مجبور کیا جاتا تھا۔ یرغمال افراد اپنے شکار سے رومانوی تعلقات استوار کرکے انہیں کرپٹو کرنسی سمیت دیگر جعلی اسکیموں یا کاروبار میں سرمایہ کاری پر آمادہ کرتے تھے۔

پولیس نے اسکیم سینٹر سے تین شاٹ گنیں، ایک 9 ایم ایم پستول، دو 38 کیلیبر ریوالور اور گولہ بارود کے 42 راؤنڈ بھی برآمد کیے ہیں۔واضح رہے کہ گزشتہ اگست اقوام متحدہ کی ایک رپورٹ میں اندازہ لگایا گیا تھا کہ انسانی اسمگلرز نے دنیا بھر سے لاکھوں لوگوں کو آن لائن فراڈ اسکیمیں چلانے کے لیے جنوب مشرقی ایشیا اسمگل کیا ہے۔