کتے کے ساتھ معیاری وقت گزارنا اضطرابی کیفیت میں کمی لا سکتا ہے

ایک نئی تحقیق میں بتایا گیا ہے کہ کتوں کے ساتھ معیاری وقت گزارنے سے ذہنی دباؤ اور اضطرابی کیفیت میں کمی واقع ہوسکتی ہے۔

تحقیق میں سائنس دانوں نے 30 صحت مند افراد کے دماغ کے اسکین کا جائزہ لیا۔ محققین نے اسکین میں دیکھا کہ کتوں کے ساتھ تھوڑا سا وقت گزارنا دماغ میں ایسی برقی سرگرمی پیدا کرتا ہے جس کا تعلق سکون، توجہ اور تخلیقی صلاحیت سے تھا۔

سائنس دانوں کا کہنا تھا کہ وہ افراد جنہوں نے تحقیق میں حصہ لیا انہوں نے کتوں کے ساتھ وقت گزارنے کے بعد تھکاوٹ اور دباؤ میں واضح کمی کے متعلق بتایا۔

محققین کی ٹیم کا کہنا تھا کہ اگرچہ ان احساسات کے پیدا ہونے میں ممکنہ طور پر جانوروں سے لگاؤ کا کردار ہو سکتا ہے لیکن نتائج نے کتوں پر مبنی تھراپی کے اضطرابی کیفیت اور دباؤ میں کمی لانے میں مدد گار ثابت ہونے کے متعلق شواہد میں اضافہ کیا۔


جرنل Plos One میں شائع ہونے والی تحقیق میں محققین نے الیکٹرو اینسیفیلوگرام (ای ای جی) ڈیوائس کا استعمال کرتے ہوئے 20 اور اس سے زیادہ برس عمر کے 15 مرد اور 15 خواتین کی دماغی سرگرمی کی پیمائش کی۔

شرکاء نے تحقیق میں چار سال کی تربیت یافتہ کتیا کے ساتھ مل کر کھیلا، اس کو کھانا کھلایا، تصویر کھنچوائی اور چہل قدمی کی۔ ہر سرگرمی اندازاً تین منٹ جاری رہی۔

محققین نے بتایا کہ جب شرکاء کتے کے ساتھ کھیل رہے تھے یا چہل قدمی کر رہے تھے تب ای ای جی نے ان کے دماغ سے نکلنے والی ایلفا لہروں کی نشان دہی کی۔

ان لہروں کا تعلق دماغ کے پُر سکون ہونے سے ہوتا ہے جبکہ کتے کو پیار کرتے وقت دماغ سے نکلنے والی بِیٹا لہروں کی نشان دہی کی گئی، جن کا تعلق توجہ میں اضافے سے ہوتا ہے۔