آذربائیجان نے کابل میں اپنا سفارتخانہ کھول دیا

آذربائیجان کے کابل میں سفیر نے افغانستان کے نائب وزیراعظم سے ملاقات کی—فوٹو: طلوع نیوز

---

افغانستان میں طالبان حکومت کے ترجمان ذیبح اللہ مجاہد نے کہا ہے کہ آذربائیجان نے کابل میں اپنا سفارت خانہ کھول دیا ہے اور آنے والے دنوں میں سفارت کار بھی بھیج دیے جائیں گے۔

طلوع نیوز کی رپورٹ کے مطابق طالبان حکومت کے ترجمان ذبیح اللہ مجاہد نے کہا کہ عالمی برادری سے امارت اسلامی افغانستان کے ساتھ سفارتی تعلقات بحال کرنے کا مطالبہ کیا اور کہا کہ آذربائیجان نے افغانستان کے ساتھ سفارتی تعلقات شروع کردیے ہیں۔

انہوں نے کہا کہ آذربائیجان نے سفارت خانہ بحال کردیا ہے اور امارت اسلامی افغانستان بھی آذربائیجان میں اپنا سفارت خانہ فعال کرے گا اور یہ دونوں ممالک کے درمیان سفارتی میدان میں ایک نیا قدم ہے، جس سے سب کو فائدہ ہوگا۔

افغانستان کے سابق سفارت کار عزیز معارج نے اس حوالے سے بتایا کہ خطے کے ممالک کے درمیان نہ صرف سیاسی اور معاشی حوالے سے آپس میں مقابلہ ہے بلکہ انہیں افغانستان کی وجہ سے داخلی سلامتی پر تشویش ہے۔

آذربائیجان کے افغانستان میں تعینات سفیر الہام محمدوف نے طالبان کے نائب وزیراعظم اور قائم مقام وزیرداخلہ سے ایک ملاقات میں سیاسی اور معاشی تعلقات وسیع کرنے پر زور دیا۔