کراچی کے علاقے ڈیفنس میں شہریوں کو لوٹنے والا ڈاکو رنگے ہاتھوں گرفتار

پولیس نے ملزم کو حراست میں لے کر اس کے قبضے سے ایک ٹی ٹی پستول اور مسروقہ سامان برآمد کرلیا۔ فوٹو؛ایکسپریس نیوز

---

ISLAMABAD: پولیس نے پوش علاقے ڈیفنس میں شہریوں کو لوٹنے والے ڈاکو کو چابک دستی کا مظاہرہ کرتے ہوئے بڑی تگ ودو کے بعد گرفتار کرلیا۔

ایکسپریس نیوز کےمطابق 2 ملزمان ڈیفنس سگنل کے قریب شہریوں سے لوٹ مار کررہے تھے کہ پولیس کے پہنچنے پر انہوں نے فائرنگ کردی تاہم پولیس کی جوابی کارروائی کے نتیجے میں موٹر سائیکل پر سوار ایک ملزم فرار جب کہ دوسرے نے پیدل ہی دوڑ لگادی لیکن پولیس اہلکاروں نے بھی ہمت نہ ہاری اور ڈیفنس کی گلیوں میں ملزم کے پیچھے بھاگنا شروع کردیا اور طویل جہدوجہد کے بعد اسے گرفتار کرلیا جس کے قبضے سے ایک ٹی ٹی پستول اور مسروقہ سامان برآمد ہوا ہے۔

پولیس کی کارروائی کے دوران ایکسپریس نیوز کے نمائندے ریحان خان اور کیمرہ مین نے بھی اپنی جان کی پرواہ کئے بغیر ہر خبر پر نظر رکھتے ہوئے اپنے ناظرین تک بروقت خبر پہنچانے کی روایت برقرار رکھی اور پولیس کی کارروائی کو کیمرے کی آنکھ سے اپنے ناظرین تک پہنچایا۔