کے پی اسمبلی کا اجلاس بلانے کیلیے پی پی کا الیکشن کمیشن عدالت سے رجوع کرنیکا اعلان
وزیر اعلیٰ کے پی باہر ڈائیلاگ مارتے ہیں اور اندر وزیراعظم کی منتیں کرتے ہیں، فیصل کریم کنڈی
پاکستان پیپلز پارٹی نے خیبر پختونخوا اسمبلی کا اجلاس بلانے کے لیے الیکشن کمیشن اور عدالت سے رجوع کرنے کا اعلان کر دیا۔
اسلام آباد میں پریس کانفرنس کرتے ہوئے رہنما پیپلزپارٹی فیصل کریم کنڈی کا کہنا تھا کہ خیبر پختونخوا حکومت بوکھلاہٹ کا شکار ہے، مخصوص نشستوں پر حلف کے لیے اجلاس نہیں بلایا جا رہا، وزیر اعلیٰ کے پی باہر ڈائیلاگ مارتے ہیں اور اندر وزیراعظم کی منتیں کرتے ہیں۔
انہوں نے کہا کہ علی امین گنڈاپور اچھے بچے کی طرح وزیراعظم کے سامنے پیش ہوئے، ہم چاہتے ہیں کہ صوبے اور فیڈریشن میں اچھے تعلقات ہوں۔
رہنما پیپلزپارٹی کا کہنا تھا کہ سینیٹ انتخابات کے بعد حکومت سازی کا عمل مکمل ہوجائے گا، سینیٹ الیکشن میں حکومتی اتحاد کامیاب ہوگا، ابھی ضمنی انتخابات بھی ہونے ہیں مگر سینیٹ انتخابات کے بعد حکومت سازی کا عمل پورا ہو جائے گا، ابھی بجٹ آنا ہے، آئی ایم ایف کے پاس جانا ہے مگر کوشش ہوگی کہ عوام کو ریلیف دیں۔
ملک میں بڑھتی دہشت گردی پر بات کرتے ہوئے فیصل کریم کنڈی نے کہا کہ حکومت نے بار بار افغانستان کو پیغام دیا کہ آپ کی زمین ہمارے خلاف استعمال ہو رہی ہے اور اب ہم اسے اور نہیں برداشت کر سکتے، ہم پڑوسیوں سے اچھے تعلقات چاہتے ہیں مگر اس کا مطلب یہ نہیں کہ آپ اپنی سرزمین ہمارے دشمنوں کے حوالے کرے۔
سیکریٹری اطلاعات پیپلز پارٹی کا کہنا تھا کہ اب بہت ہوگیا، اب یہ چیزیں برداشت نہیں کرنی چاہیے، ہم روزانہ لاشیں نہیں اٹھا سکتے، اب بات بیانات سے آگے نکل گئی ہے۔