رمیز راجا کے عامر سے متعلق بیان پر سلیکشن کمیٹی کا ردعمل آگیا

سابق کرکٹر و کمنٹیٹر نے عامر کیخلاف سخت الفاظ کا انتخاب کیا، یہ انکی اپنی رائے ہے، وہاب ریاض (فوٹو: ایکسپریس ویب)

---

سابق چیئرمین پاکستان کرکٹ بورڈ (پی سی بی) رمیز راجا کی جانب سے محمد عامر کے حوالے سے دیئے گئے ریماکس پر سلیکشن کمیٹی کا ردعمل بھی سامنے آگیا۔

لاہور کے قذافی اسٹیڈیم میں سلیکشن کمیٹی نے نیوزی لینڈ کے خلاف ہوم سیریز کیلئے 17 رکنی اسکواڈ کا کیا، اس موقع پر میڈیا سے گفتگو کرتے ہوئے وہاب ریاض نے کہا کہ پاکستان سپر لیگ (پی ایس ایل) میں پرفارم کرنے والے کھلاڑیوں کو موقع دیا ہے۔

اس موقع پر وہاب ریاض سے سوال کیا گیا کہ رمیز راجا کی جانب سے محمد عامر کی انٹرنیشنل کرکٹ میں واپسی سے متعلق سخت موقف سامنے آیا ہے جس میں انہوں نے کہا کہ اگر میرا بیٹا بھی خدانخواستہ فکسنگ میں ملوث ہوتا تو میں اسے عاق کردیتا؟ اس پر کیا کہیں گے۔

سلیکشن کمیٹی کے سربراہ نے اسکا جواب دیتے ہوئے کہا کہ رمیز راجا کا محمد عامر سے متعلق بیان بہت سخت ہے، مجھے نہیں لگتا اس موقع پر ایسی بات کہنی چاہیے تھی۔ ہر انسان اپنا موقف ہے، ہمارا دین بھی اپنی رائے رکھنے کا حق دیتا ہے، اسکے برعکس وہ صحیح ہے یا غلط! یہ انکی سوچ ہے اور کسی کی نہیں۔

مزید پڑھیں: کیویز کیخلاف سیریز؛ عامر، عماد کی واپسی! عثمان خان بھی اسکواڈ کا حصہ

خیال رہے کہ گزشتہ دنوں ایک انٹرویو کے دوران سابق کرکٹر و کمنٹیٹر رمیز راجا نے کہا تھا کہ اسپاٹ فکسنگ کیس میں سزا یافتہ کرکٹر محمد عامر کو پاکستان سے کھیلنے کی اجازت نہیں ملنی چاہیے تھی، انگلینڈ کے خلاف میچ فکس کرکے پاکستان کو بدنام کیا، لارڈز میں کمنٹری کے دوران فینز اور دیگر لوگوں نے مجھ سے نفرت کی کیونکہ ہم فکسنگ ملوث لوگوں کو بےنقاب کررہے تھے۔ اس کے بعد میڈیا میں جتنا ہمارے ساتھ برا سلوک ہوا اسکو کبھی نہیں بھول سکتا ہے۔

مزید پڑھیں: ''میرا بیٹا بھی اگر فکسنگ میں ملوث ہوتا تو اسے عاق کردیتا''

سابق کرکٹر کا مزید کہنا تھا کہ کوئی بھی کرکٹر اگر ایسے کاموں میں ملوث ہوتا ہے تو اسکا کیرئیر ختم ہوجاتا ہے، اس سے ہمدردی ضرور ہوتی ہے لیکن میری کتاب میں ملک کو بدنام کرنے کی کوئی معافی نہیں ہے۔