دعا ہے اگلی عید الفطر تک پاکستان معاشی طور پر مزید مستحکم ہو وزیراعظم

وزیراعظم شہباز شریف نے اتحادی جماعتوں کے رہنماؤںکو عید کی مبارک باد دی—فائل: فوٹو

---

وزیراعظم شہباز شریف نے صدر مملکت آصف علی زرداری، پاکستان پیپلزپارٹی (پی پی پی) کے چیئرمین بلاول بھٹو زرداری سمیت اتحادی جماعتوں کے رہنماؤں کو عید کی مبارک باد دیتے ہوئے کہا ہے کہ دعا ہے کہ آئندہ عیدالفطر پاکستان معاشی طور پر مزید مضبوط اور مستحکم ہو۔

ایکسپریس نیوز کے مطابق وزیراعظم شہباز شریف نے حکومت کی اتحادی جماعتوں کے رہنماؤں صدر مملکت آصف علی زرداری، چیئرمین پی پی پی بلاول بھٹو زرداری اور دیگر اتحادی جماعتوں کے رہنماؤں کو بھی عید الفطر کی مبارک باد دی۔

شہباز شریف نے کہا کہ عید کے اس پر مسرت اور بابرکت موقعے پر پاکستان کی بہتری کے لیے آپ کے تعاون کا تہہ دل سے مشکور ہوں، پاکستان کے معاشی استحکام کے لیے اتحادی حکومت میں آپ کا تعاون تاریخ میں سنہری حروف سے لکھا جائے گا۔

وزیر اعظم شہباز شریف نے کہا کہ اللہ رب العزت سے دعا ہے کہ ملک کی ترقی و خوش حالی کے لیے یہ اتحاد مبارک ثابت ہو اور آئندہ عید الفطر تک پاکستان معاشی طور پر مزید مضبوط اور مستحکم ہو۔

انہوں نے کہا کہ ان شااللہ ہم دن رات محنت سے پاکستان کو اس مقام پر لے جائیں گے، جس کا خواب پاکستان کے معماروں نے دیکھا تھا۔

وزیراعظم آفس کے مطابق وزیراعظم شہباز شریف نے افواجِ پاکستان کے سربراہان چیئرمین جوائنٹ چیفز آف اسٹاف کمیٹی جنرل ساحر شمشاد مرزا، آرمی چیف جنرل عاصم منیر، پاک فضائیہ کے سربرہ ائیر چیف مارشل ظہر احمد بابر سدھو اور نیول چیف ایڈمرل نوید اشرف کو ٹیلی فون کرکے عیدالفطر کی مبارک باد دی۔

وزیراعظم نے کہا کہ مجھ سمیت پوری پاکستانی قوم سرحدوں پر اپنے وطن کی حفاظت پر مامور جوانوں کو خراجِ تحسین پیش کرتی ہے، افواجِ پاکستان کے سربراہان کی پیشہ ورانہ قیادت میں ہمارے جوان وطن کے دشمنوں اور دہشت گردوں کے ناپاک عزائم کو ناکام بنا رہے ہیں۔

انہوں نے کہا کہ عید الفطر کے موقع پر پوری قوم اپنے شہدا کو خراجِ عقیدت اور ان کے اہل خانہ کو خراجِ تحسین پیش کرتی ہے۔