سیاسی پارٹی کی مہم چلانے کی جعلی ویڈیوعامرخان کا قانونی کارروائی کا اعلان

بالی ووڈ میں 35 سالہ کیرئیر میں کسی سیاسی پارٹی سے وابستگی نہیں رہی، عامرخان:فوٹو:فائل

---

بالی ووڈ اداکار عامرخان کی ایک سیاسی جماعت کی تشہیری مہم کی جعلی ویڈیو سامنے آگئی۔

بھارتی میڈیا کے مطابق بالی ووڈ کے سینئر اداکارعامرخان نے جعلی ویڈیو بنانے والوں کے خلاف قانونی کارروائی کرنے کا اعلان کردیا۔

عامر خان کے دفتر سے جاری بیان کے مطابق اداکار نے اپنے 35 سالہ فلمی کیرئیر کے دوران کبھی کسی سیاسی پارٹی کی حمایت نہیں۔ عامرخان نے ماضی میں متعدد بار عوام میں شعور اجاگر کرنے کے لیے الیکشن کمیشن کی مہم میں حصہ لیا ہے تاہم ان کی کبھی بھی کسی سیاسی جماعت سے وابستگی نہیں رہی ہے۔

بیان میں مزید کہا گیا ہے کہ سوشل میڈیا پر گردش کرنے والی ویڈیو سراسر جعلی ہے۔ عامر خان نے اس سلسلے میں اعلیٰ حکام سے رابطہ کیا ہے اور جعلی ویڈیو بنانے والوں کے خلاف کارروائی کے لیے سائبر کرائم سیل ممبئی میں ایف آئی آر درج کروائی گئی ہے۔

آرٹیفیشل انٹلیجنس ( اے آئی) کی مدد سے بنائی گئی ڈیپ فیک ویڈیو میں عامرخان کے 10 سال پرانے ٹی وی شو کے کلپس استعمال کیےگئے ہیں۔