پاکستان کا چین سے مل کر سولر پینلز کی تیاری کا منصوبہ

ترقیاتی بورڈ نے سولر پینلز کی تیاری کی 10 سالہ پالیسی کو حتمی شکل دے دی

این این آئی April 30, 2024

پاکستان کو 27 ارب ڈالر کے سالانہ درآمدی بل کو کم کرنے میں بھی مدد ملے گی (فوٹو : فائل)

پاکستان نے چین سے مل کر سولر پینلز کی تیاری کا منصوبہ بنا لیا۔

چین کے سرکاری اور نجی شعبے کے ساتھ ملکر حکومت پاکستان نے پاکستان میں سولر پینلز کی تیاری شروع کرنے کا منصوبہ بنایا ہے جو سبز توانائی پیدا کرنے کے لیے ایک اہم سنگ میل ہے، اس اقدام سے پاکستان کو 27 ارب ڈالر کے سالانہ درآمدی بل کو کم کرنے میں بھی مدد ملے گی۔

گوادر پرو کے مطابق متبادل توانائی کے ترقیاتی بورڈ نے سولر پینلز اور اس سے منسلک آلات کی تیاری کی 10 سالہ پالیسی کو حتمی شکل دیدی ہے، چین کی مدد سے سولر پینل کی تیاری 2030 تک پورے پاکستان میں تقریباً 9.7 گیگا واٹ قابل تجدید توانائی کے پاور جنریشن سسٹمز کی تنصیب کیلیے حکومتی کوششوں میں معاون ثابت ہو گی۔