جس وزیراعلی کو اسلام آباد چڑھائی کا شوق ہے اپنے لیڈر کا حشر دیکھے شرجیل میمن

کابینہ میں شامل نہ ہونے کا مطلب یہ نہیں کہ وفاقی حکومت کو کام نہیں کرنے دے رہے، وزیرِ ٹرانسپورٹ

---

وزیرِ ٹرانسپورٹ سندھ شرجیل میمن نے کہا ہے کہ ہر اچھے کام میں حکومت کے ساتھ ہیں۔

کراچی میں میڈیا سے گفتگو کرتے ہوئے انہوں نے کہا کہ باتوں سے نہیں عملی طور پر ٹرانسپورٹ سیکٹر کو پیروں پر کھڑا کرنا ہے، ریڈ لائن بہت اہم منصوبہ ہے، حکومت کام کررہی ہے اور کرنے کی نیت سے بیٹھی ہے، کنٹریکٹر ہمارے ساتھ مل کر دن رات کام کریں گے، ایک سال کا کام چھ ماہ میں اور چھ ماہ کا کام تین ماہ میں مکمل کریں گے۔

انہوں نے کہا کہ کابینہ میں شامل نہ ہونے کا مطلب نہیں کہ وفاقی حکومت کو کام نہیں کرنے دے رہے، پیپلز پارٹی ملک کی بہتری کے لیے ہر اچھے کام میں حکومت کے ساتھ ہے۔

انہوں نے زور دیا کہ ریڈ لائن منصوبے کی لاگت پر کنٹریکٹر، کنسلٹنٹ اور ایشیائی ترقیاتی بینک مل کر نظر ثانی کررہے ہیں، لاگت میں تبدیلی کنسلٹنٹ کی مرضی اور مشاورت سے ہوگی۔

انہوں نے مزید کہا کہ نو مئی کو معصوم بچوں اور بہنوں کو عمران خان نے استعمال کیا، یہ سبق ہے جو بھی لیڈر تشدد کی بات کرے اس کی بات نہ سنیں، کسی وزیراعلی کو اسلام آباد چڑھائی کا شوق ہے تو وہ اپنے لیڈر کا حشر دیکھے۔