بھارتی اداکارہ کار حادثے میں چل بسیں اہلخانہ شدید زخمی

اداکارہ کی گاڑی پہلے سڑک پر ایک ڈیوائیڈر سے ٹکرائی اور پھر بس سے ٹکرائی

ویب ڈیسک May 13, 2024

حادثے میں اداکارہ کی بہن اور شوہر شدید زخمی ہوئے : فوٹو : فائل

کنڑ ڈرامہ انڈسٹری کی معروف اداکارہ پویترا جےرام کی کار کو حادثہ پیش آیا جس کے نتیجے میں اداکارہ موقع پر ہی دم توڑ گئیں جبکہ اُن کے اہلخانہ شدید زخمی ہیں۔

بھارتی میڈیا کے مطابق 12 مئی اتوار کے روز اداکارہ پویترا جےرام اپنی بہن اور بوائے فرینڈ و ساتھی اداکار چندراکانت کے ہمراہ کرناٹک کے منڈیا ضلع کے ہاناکیرے سے واپسی کا سفر کررہی تھیں کہ اچانک اُن کے ڈرائیور نے گاڑی کا کنٹرول کھو دیا۔

رپورٹ میں بتایا گیا کہ ڈرائیور کی جانب سے کنٹرول کھونے پر اداکارہ کی گاڑی پہلے سڑک پر ایک ڈیوائیڈر سے ٹکرائی اور پھر اُن کی گاڑی ایک بس سے ٹکرا گئی۔

بتایا جارہا ہے کہ یہ خوفناک حادثہ بھارتی شہر حیدرآباد دکن کے محبوب نگر کے قریب پیش آیا جس کے نتیجے میں اداکارہ پویترا کی موقع پر ہی موت ہوگئی جبکہ اُن کے بوائے فرینڈ، بہن اور ڈرائیور شدید زخمی ہیں۔

اداکارہ پویترا کی اچانک موت سے کنڑ اور تیلگو ٹیلی وژن انڈسٹریز کو گہرا صدمہ پہنچا ہے، ساتھی فنکاروں اور مداحوں کی جانب سے اداکارہ کی موت پر گہرے دُکھ کا اظہار کیا جارہا ہے۔

دوسری جانب پویترا کے بوائے فرینڈ اور ساتھی اداکار چندراکانت نے اپنے آفیشل انسٹاگرام ہینڈل پر اداکارہ کے ہمراہ لی گئی اپنی تصویر پوسٹ کی اور اُن کی یاد میں جذباتی پیغام بھی لکھا۔