کراچی میں 7سالہ معصوم بچی سے جنسی زیادتی

پولیس نے مقدمہ درج کر کے نامعلوم ملزمان کی تلاش شروع کردی

Staff Reporter May 14, 2024

واقعہ کی مزید تحقیقات جاری ہیں:فوٹو:فائل

کراچی میں درندہ صفت ملزمان نے 7 سالہ بچی کو جنسی زیادتی کا نشانہ بنا ڈالا۔

کراچی کے علاقے پاکستان بازار پولیس نے7سالہ معصوم بچی کو زیادتی کا نشانہ بنانے کے واقعے کامقدمہ متاثرہ بچی کے دادا کی مدعیت میں نامعلوم ملزمان کے خلاف درج کرکے تلاش شروع کردی ہے۔

پولیس حکام کے مطابق متاثرہ بچی اورنگی ٹاؤن سیکٹر سولہ اتحاد کالونی کچی آبادی کی رہائشی ہے اور پیر کی شام 4 بجے کھیلنے کے لئے گھر سے نکلی تھی۔ بچی زخمی حالت میں شام 5 بجے روتی ہوئی گھر لوٹی۔ بچی کو قومی ادارہ برائے امراض اطفال میں طبی امداد دی گئی۔

پولیس سرجن کے مطابق طبی معائنے میں بچی کے ساتھ زیادتی کی تصدیق ہوگئی ہے۔ زخمی بچی کے طبی معائنے کے ساتھ ڈی این اے کے سیمپل بھی لیے گئے ہیں۔ بچی کی حالت خطرے سے باہر ہے۔

پولیس حکام کا کہنا ہے کہ بچی کے گھر کے اطراف کوئی سی سی ٹی وی کیمرہ موجود نہیں۔ اطراف کے سی سی ٹی وی کیمروں کی جانچ کے ساتھ انٹیلی جنس بنیادوں پر بھی تحقیقات کی جارہی ہے۔