وفاقی وزارت تعلیم کا اساتذہ کی جدید خطوط پر ٹریننگ کیلیے انقلابی اقدام

وفاقی تعلیم اور پیشہ ورانہ تربیت کی وزارت کے سیکرٹری محی الدین وانی نے این جی او کارانداز پاکستان کے ساتھ اساتذہ کی تربیت اور نوجوانوں کو بااختیار بنانے کے لیے مالیات سے متعلق علمی و تعلیمی صلاحیتوں میں اضافے کے لیے ایک معاہدے پر دستخط کردیئے۔

ایکسپریس نیوز کے مطابق اس معاہدے کے تحت این جی او کارانداز ملک بھر میں وفاق کے زیر انتظام 340 سے زائد اسکولوں کے 3 ہزار سے زائد اساتذہ کو تربیت فراہم کرے گی جس سے 1 لاکھ 34 ہزار سے زائد طلباء مستفید ہوں گے۔

وفاقی وزارت تعلیم اور پیشہ ورانہ تربیت کے اس اقدام کا مقصد مالی ذمہ داری کو فروغ دینے پر توجہ مرکوز کرنے کے ساتھ ساتھ نوجوان نسل کو عالمی معیشت سے مسابقت پیدا کرنے کے لیے درکار مہارتوں سے آراستہ کرنا ہے۔


این جی او کارانداز اور وزارت وفاقی تعلیم و پیشہ ورانہ تربیت کا یہ معاہدہ سماجی اقتصادی ترقی اور نمو کے لیے مشترکہ عزم کی نشاندہی کرتا ہے۔ جس کا مقصد نوجوانوں کو باختیار بنانا ہے۔

معاہدے پر سیکرٹری وفاقی تعلیم اور پیشہ ورانہ تربیت غلام محی الدین وانی اور کارانداز کے سی ای او نے دستخط کیے۔