افغانستان میں طالبان کا نیٹو آئل ٹرمینل پر حملہ 37 ٹینکر تباہ

طالبان نے نیٹو کے آئل ٹرمینل پر حملے کی ذمہ داری قبول کر لی ہے۔ فوٹو فائل

---

افغان طالبان نے صوبہ ننگر ہار میں نیٹو آئل ٹرمنل پر حملہ کر کے 37ٹینکرتباہ کر دیئے جب کہ فورسز کی جوابی کارروائی میں تینوں حملہ آور بھی مارے گئے۔

غیر ملکی خبررساں ایجنسی کے مطابق افغان صوبے ننگر ہار کے پولیس چیف کا کہنا ہے کہ طالبان نے طورخم میں پاک افغان سرحد کے قریب نیٹو کے آئل ٹرمنل پر مقناطیسی بموں سے حملہ کر دیا جس کے نتیجے میں پارکنگ میں کھڑے 37 آئل ٹینکر تباہ ہو گئے جب کہ افغان سیکیورٹی فورسز کی جوابی کارروائی میں 2 حملہ آور مارے گئے اور ایک حملہ آور نے خود کو دھماکا خیز مواد سے اڑا لیا۔

نیٹو کے ترجمان نے بھی حملے کی تصدیق کی ہے جب کہ دوسری جانب افغان طالبان کے ترجمان ذبیح اللہ مجاہد نے آئل ٹرمینل پر حملے کی ذمہ داری قبول کر لی ہے۔