ماں نے زیور گروی رکھ کر اسٹوڈیو بنانے کے لیے پیسے دئیے اے آر رحمان

والد کے انتقال کے بعد والدہ ہی نے ہمیں اس مقام تک پہنچایا،اے آر رحمان:فوٹو:فائل

---

بالی ووڈ کے عالمی شہرت یافتہ موسیقار اور گلوکار اے آر رحمان کا کہنا ہے میری کامیابی میں میری مرحوم والدہ کا بنیادی کردار ہے۔

اے آر رحمان نے ایک انٹرویو میں اپنے کیرئیر کے ابتدائی دنوں کے بارے میں بات کرتے ہوئے اپنی مرحوم والدہ کو خراج تحسین پیش کرتے ہوئے کہا کہ میری کامیابی میری والدہ کی مرہون منت ہے۔

اے آر رحمان کا کہنا تھا کہ جب میں نے کام شروع کیا تو میرے پاس اسٹوڈٰیو بنانے کے لیے پیسے نہیں تھے۔ ایک خالی کمرے میں کارپٹ پر بیٹھ کر کام کرتا تھا۔ میری والدہ نے مجھے آگے بڑھانے اور کامیاب بنانے کے لیے بہت سی قربانیاں دیں۔ انہوں نے اپنا زیور گروی رکھ کر مجھے پیسے دئیے۔

بالی ووڈ موسیقار کا مزید کہنا تھا کہ والدہ کے دئیے گئے پیسوں سے اسٹوڈیو بنایا اور موسیقی کے آلات خریدے جس کے بعد متعدد دھنیں تخلیق کیں جو بہت مشہور ہوئیں۔ میں بہت چھوٹا تھا جب والد کا انتقال ہوا جس کے بعد ہماری ماں ہی نے ہمیں پال پوس کر اس مقام تک پہنچایا۔