دیس بدیس کے کھانے

مشرقی کھانوں میں مغربی آمیزش ذائقے کی الگ دنیا روشناس کراتی ہے۔

رقیہ اقبال June 22, 2014

گرمیوں میں آئس کریم سے دور نہیں رہا جاسکتا۔ فوٹو: فائل

براؤنی فج آئس کریم

اجزا:

ایواپوربٹڈ ملک (ایک کین)، کنڈینسڈ ملک (تین چوتھائی کین)، کریم (چار سو گرام) پھینٹ لیں، چاکلیٹ سوس (آدھی پیالی)، چاکلیٹ ایسنس (آدھا چائے کا چمچا)، براؤنی دو ٹکڑے (کٹی ہوئی)۔

ترکیب:

پہلے ایواپوریٹڈ ملک کو خوب پھینٹ لیں۔ اس کے بعد اسے کنڈینسڈ ملک، کریم، چاکلیٹ ایسنس اور چاکلیٹ سوس کے ساتھ فولڈ کرلیں۔ پھر اسے ایئر ٹائٹ کنٹینر میں چار گھنٹے کے لیے رکھیں۔ اس کے بعد اسے نکال کر براؤنیز میں فولڈ کریں اور ٹھنڈا کر کے نوش کریں۔

فروزن اسٹرابری

اجزا:

اسفنج کیک (ایک عدد) فنگرز کی شکل میں کٹا ہوا، اسٹرابریز ایک پیالی (سلائس کی ہوئی)، کریم (ایک پیالی)، اسٹرابری آئس کریم (حسب ضرورت)، اسٹرابری سوس (سرونگ کے لیے)

ترکیب:

ایک پیالے میں اسفنج کیک کو سیٹ کر کے اسٹرابری آئس کریم ڈال دیں۔ اس کے بعد اسٹرابری اور کریم سے گارنش کر کے فریز کردیں۔ پھر اسٹرابری سوس ڈال کر نوش کریں۔

چاکلیٹ آئس کریم

اجزاء:

دودھ (ایک لیٹر)، انڈے (چھے عدد)، کارن فلور (دوکھانے کے چمچے)، چینی (ڈیڑھ پیالی)، ونیلا ایسنس (ایک کھانے کا چمچا)، کریم (600 ملی لیٹر)، کوکو پاؤڈر (تین کھانے کے چمچے)، چاکلیٹ چپ (ایک پیالی)، اسٹیبلائزر پاؤڈر (آدھا چائے کا چمچا)، گارنش کے لیے مندرجہ ذیل اجزا (حسب ذائقہ)، ویفربسکٹ، مختلف رنگوں کی جیلی، چیری، چاکلیٹ سوس، پیرالائن، فروٹ کاکٹیل، پودینے کی پتیاں، کرشڈ کورن فلکیس، مختلف رنگوں کے اسپرنکلز۔

ترکیب:

پہلے انڈے کی زردی اور سفیدی الگ کرلیں، اب زردی کو پھینٹ لیں۔ اس کے بعد ایک پین میں دودھ لیں اور اس میں چینی، ونیلا ایسنس، انڈے کی پھینٹی ہوئی زردی، کارن فلور اور کوکو پاؤڈر شامل کرکے اچھی طرح پھینٹ لیں، کہ یہ محلول کی طرح ہوجائے۔

اب پین کو چولہے پر رکھ دیں۔ درمیانی آنچ پر چمچا ہلاتے ہوئے اتنا پکائیں کہ یہ کسٹرڈ کی طرح گاڑھا ہوجائے، پھر اس میں اسٹیبلائزر پاؤڈر شامل کریں۔ چولہے سے ہٹا کے آمیزے کو ٹھنڈا کرلیں۔

کریم کو اچھی طرح پھینٹ لیں اور اسے آمیزے میں شامل کرکے ہلاتے جائیں۔ انڈے کی سفیدی کو اتنا پھینٹیں کہ وہ فوم کی طرح بن جائے۔ اب انڈے کی سفیدی کو آمیزے میں شامل کرکے فولڈ کریں۔ پھر چاکلیٹ چپ ڈال کے فولڈ کریں۔ آپ اس میں خشک میوے بھی ڈال سکتی ہیں۔

اس آمیزے کو باؤل میں ڈالیں جس میں فریز کرسکتے ہوں اور فریزر میں رکھ دیں۔ پانچ سے چھے گھنٹے کے بعد اسے فریزر سے نکال کے بیٹ کریں کہ اس طرح ہو جائے، جیسی فریز ہو نے سے پہلے تھی۔

پھر باؤل فریزر میں رکھ دیں اور پانچ گھنٹے بعد آئس کریم فریزر سے نکال کے بیٹ کریں اور دوبارہ فریزر میں رکھ دیں۔ یہ عمل تین مرتبہ کرنا ہے اور ہر بار آئس کریم دس سے پندرہ منٹ بیٹ کرنی ہے۔

جب آئس کریم تیار ہو جائے، تو آئس کریم پیالی میں اسکوپ ڈالیں۔ اپنی مرضی کے گارنشنگ اجزا سے گارنش کرکے پیش کریں۔

(فرائیڈ آئس کریم بنانے کے لیے)

گول سخت آئس کریم کا اسکوپ لیں اور اسے بریڈ کرمز میں رول کرکے تیز آنچ پر فرائی کر لیں۔ یہ چند سیکنڈ میں تل جائے گا۔

اس بات کا یقین کر لیں کہ آئس کریم سکوپ نرم نہ ہو اور تیل بہت گرم ہو۔ آپ گھر میں بھی کورن فلیکس کی مدد سے آئس کریم کو فرائیڈ آئس کریم کا تاثر دے سکتی ہیں۔ اس کے لیے کورن فلکیس کو ہاتھ سے کرش کریں، پھر آئس کریم اسکوپ کو اس میں کوٹ کر تل لیں۔ اس کے بعد کریم اور آئسنگ شوگر سے سجا کے پیش کریں۔

پھل دار آئس کریم

اجزا:

آم (تین عدد)، کیلے (تین عدد)، چیکو (چار عدد)، دْودھ (ایک کلو)، ربڑی (ایک کلو)، پستے (25گرام )، بادام (25گرام )، چینی (دو پیالی)، الائچی دو عدد (دانے نکال لیں)۔

ترکیب:

آم، کیلے، چیکو، چینی اور الائچی کو دْودھ میں ڈال کر پیس لیں۔ اس طرح ان سب کا مکس شیک تیار کرلیں اور دودھ کو ہلکی آنچ پر اْبال آنے تک رکھ دیں۔ اْبال آنے پر ربڑی شامل کریں اور دودھ کو ہلکی آنچ پر گاڑھا ہونے کے لیے چھوڑ دیں۔ گاڑھا ہونے پر دْودھ ایک سیدھے سانچے میں ڈال کر فریزر میں رکھ کر جما لیں۔ اس کے بعد اس کے اوپر پستے بادام ڈال کر پیش کریں۔ خوش ذائقہ پھل دار آئس کریم تیار ہے۔

وینیلا آئس کریم

اجزا:

ڈبل کریم (دوپیالی)، دودھ(دو پیالی)، انڈے(چار عدد) زردی الگ کرلیں، شکر (تین چوتھائی پیالی)، وینیلا ایسنس (حسب ضرورت)۔

ترکیب:

نان اسٹک پین میں دودھ اور کریم ڈال کر درمیانی آنچ پر پکائیں اور لکڑی کے چمچے سے ملا لیں۔ ایک پیالے میں انڈے کی زردی، وینیلا ایسنس اور شکر ڈال کر خوب پھینٹیں، اس کے بعد اس میں کریم اور آدھی پیالی دودھ کے آمیزے کو زردی میں ڈال کر بیٹر سے اچھی طرح ملا لیں۔ اس کے بعد زردی والے آمیزے کو سوس پین میں گرم ہوتے ہوئے آمیزے میں شامل کر کے ہلکی آنچ پر آٹھ منٹ تک پکائیں۔ یہ آمیزہ اتنا گاڑھا ہو جائے کہ چمچے پر اس کی کوٹنگ سی بننے لگے، تو سوس پین کو چولہے سے ہٹالیں۔ آمیزے کو چھان کر سانچے میں ڈالیں اور ڈھانپ کر فریزر میں رکھیں۔ اس کے بعد نکال کر بیٹر سے پھینٹ کر دوبارہ چھ سے آٹھ گھنٹے کے لیے فریزر میں رکھ دیں۔ مزیدار آئس کریم تیار ہے۔

آم کی آئس کریم

اجزا:

آم کا گودا (آدھا کلو)، کنڈینسڈ مِلک (آدھا ٹِن)، کریم (ایک پیکٹ)، خشک دودھ (ایک پیالی)، آئسنگ شوگر (ایک پیالی)، دودھ (ایک پیالی)۔

ترکیب:

پین میں دودھ اور آئسنگ شوگر ڈال کر اتنا پکائیں کہ اچھی طرح حل ہو جائے۔اس کے بعد آم کا گودا، کنڈینسڈ ملک، کریم اور خشک دودھ بلینڈر میں شامل کر کے بلینڈ کر لیں۔ پھر تمام چیزوں کو آئس کریم کے سانچے میں ڈال کر فریزر میں آٹھ گھنٹے کے لیے جما لیں اور مزے دار آم کی آئس کریم نوش کریں۔