بلوچستان میں گرمی کی لہر برقرار سبی میں پارہ 49 ڈگری تک پہنچ گیا
چاغی، دالبندین، تفتان میں بھی شدید ترین گرمی ، درجہ حرارت 48 ڈگری سینٹی گریڈ ریکارڈ، کوئٹہ میں گرمی 38 ڈگری رہی
دیگر صوبوں کی طرح بلوچستان میں بھی گرمی کی لہر برقرار ہے، سبی میں درجہ حرارت 49 جب کہ چاغی، دالبندین اور تفتان میں 48 ڈگری ریکارڈ کیا گیا۔
ایکسپریس نیوز کے مطابق پورا ملک حالیہ کئی دنوں سے گرمی کی لپیٹ میں ہے اور گرمی نئے نئے ریکارڈ بنارہی ہے، ماہ مئی میں ملک بھر میں گرمی کے کئی دہائی پرانے ریکارڈ ٹوٹ گئے ہیں۔
بلوچستان بھی گرمی کی شدید لہر سے متاثر ہے، آج کوئٹہ میں درج حرات 38 ڈگری سینٹی گریڈ ریکارڈ کیا گیا تاہم سب سے زیادہ گرمی سبی میں رہی جہاں پارہ 49 ڈگری تک پہنچ گیا۔
محکمہ موسمیات کے مطابق اسی طرح چاغی، دالبندین، تفتان میں بھی شدید ترین گرمی رہی، لو چلنے کے سبب درجہ حرارت 48 ڈگری سینٹی گریڈ ریکارڈ کیا گیا۔
اطلاعات کے مطابق اندرون صوبہ مختلف میدانی علاقوں میں بدترین گرمی کے سبب بجلی بھی غائب ہے، نصیر آباد، صحت پور، ڈھاڈر اور بولان میں معمولات زندگی بری طرح متاثر ہیں۔