بانی پی ٹی آئی کے اکاؤنٹ سے ویڈیو اپلوڈنگ پرعمران خان سمیت 4 رہنماؤں کو ایف آئی اے کا نوٹس

ایف آئی اے نے پی ٹی آئی رہنماؤں کو منگل کو طلب کرلیا ہے—فوٹو: فائل

---

پاکستان تحریک انصاف (پی ٹی آئی) کے بانی چئیرمین عمران خان کے ایکس اکاؤنٹ سے شیخ مجیب الرحمان کی ویڈیو اپلوڈنگ کرنے کے معاملے پر ایف آئی اے نے بانی پی ٹی آئی کے بعد مزید تین رہنماؤں کو بھی نوٹس جاری کر دیا۔

ایکسپریس نیوز کے مطابق پی ٹی آئی کے چیئرمین بیرسٹر گوہر خان، سیکریٹری جنرل عمر ایوب خان اور سیکریٹری اطلاعات رؤف حسن کو ایف آئی اے نے منگل کو صبح 11 بجے انکوائری کے لیے طلب کر لیا گیا ہے۔

نوٹس میں کہا گیا ہے کہ بانی پی ٹی آئی کے آفیشل ایکس اکاؤنٹ کے غیر قانونی استعمال پر کی جانے والی انکوائری کے سلسلے میں مذکورہ رہنماؤں کو نوٹس جاری کیا گیا ہے۔

اس حوالے سے کہا گیا کہ بانی پی ٹی آئی کے آفیشل اکاؤنٹ سے ریاست اور ریاستی اداروں کے خلاف عوام کو اشتعال دلانے کی کوشش کی گئی ہے، جس سے عوام میں خوف اور بے چینی پھیلنے کا خدشہ ہے۔

نوٹس میں بتایا گیا ہے کہ اس اشتعال انگیزی سے عوام کو ریاست اور اداروں کے خلاف قانون ہاتھ میں لینے پر بھی اکسایا جا سکتا ہے۔