کراچی صدر موبائل مارکیٹ میں چھینے گئے فونزکے آئی ایم ای آئی بدلنے والے دکاندار گرفتار

گرفتار ملزمان اعلی تعلیم یافتہ ہیں اورآئی ٹی میں مہارت رکھتے ہیں

Staff Reporter June 02, 2024

گرفتار ملزمان اعلی تعلیم یافتہ ہیں اورآئی ٹی میں مہارت رکھتے ہیں

گارڈن پولیس نےکارروائی کرتے ہوئے چھینےاورچوری شدہ موبائل فونز کے آئی ایم ای آئی تبدیل کرنے والے گروہ کے3ملزمان کوگرفتارکرکے ان کے قبضے سے ڈکیتی،چوری،چھینے ہوئے 17 موبائل فونزاور1 موٹرسائیکل برآمد کرلی۔

تفصیلات کے مطابق گارڈن پولیس نےانٹیلی جنس بیسڈ کارروائی کرتے ہوئے چھینے اورچوری شدہ موبائل فونزکے آئی ایم ای آئی تبدیل کرنے والے گروہ کے3ملزمان سمیر، محمد عاطف اورخالد کو گرفتارکرکے ان کے قبضے سے ڈکیتی،چوری،چھینے ہوئے 17 موبائل فونز اور1 موٹرسائیکل برآمد کرلی۔

ایس ایس پی سٹی عارف عزیز کے مطابق گرفتار ملزمان اعلی تعلیم یافتہ ہیں اورآئی ٹی میں مہارت رکھتے ہیں، جو مختلف سافٹ ویئرزکی مدد سے مسروقہ موبائل فونز کے آئی ایم ای آئی نمبرز تبدیل کرتے تھے۔

گرفتار ملزمان سے برآمدہ موبائل فونزمختلف تھانہ جات کی حدود سے چھینے اورچوری شدہ ہیں۔ وہ مسروقہ موبائل فونز کے آئی ایم ای آئی، بیرون ملک سے درآمد شدہ موبائل فونزاورکی پیڈ موبائل فونزسے تبدیل کرکے ایکٹوکرتے تھے۔

ملزمان اب تک سینکڑوں لوٹے گئے موبائل فونز کی آئی ایم ای آئی نمبرز تبدیل کرچکے ہیں۔ انہوں نے دوران تفتیش متعدد دکانداروں کے نام لئے ہیں جو ان سے مسروقہ موبائل فونز کے آئی ایم ای آئی تبدیل کرواتے تھے۔

ملزمان سینکڑوں نان پی ٹی اے موبائل فونز کے آئی ایم ای آئی بھی تبدیل کرکے ایکٹو کرچکے ہیں۔ ملزم عاطف اورخالد کی صدر ڈپلومیٹ مارکیٹ میں موبائل شاپ ہے۔ دونوں آپس میں پارٹنرز ہیں ۔ ملزم سمیر کی اپنی علیحدہ شاپ ہے جو اسی مارکیٹ میں ہے۔ ان کے خلاف مقدمات درج کرکے تفتیش شروع کردی گئی ہے۔