مزار قائد کی سیکیورٹی بہتر بنانے کیلیے جدید کیمروں کی تنصیب

بانی پاکستان قائد اعظم محمد علی جناح کے مزار کی سیکیورٹی کو فول پروف بنانے کیلیے مزار پر نئے جدید کیمرے نصب کرنے کا کام شروع کردیا گیا ہے۔

تفصیلات کے مطابق 61 ایکڑ کے رقبے پر پھیلے بانی پاکستان کے مزار پر سیکیورٹی کومربوط اورمزید بہتربنانے کے لیے نئے کیمروں کی تنصیب کا کام شروع کردیا گیا، پرانےکیمروں کے ساتھ جدید ٹیکنالوجی کے نئے 153 بلٹ کیمرے نصب کیے جارہے ہیں۔

اس سے قبل مزارقائد پرسیکیورٹی کے لیے 48 کیمرے نصب تھے، جن کے ذریعے خارجی وداخلی دروازوں کے علاوہ مزار قائد کے گنبد کے اطراف سبزہ زارسمیت دیگرمقامات کی نگرانی کی جاتی تھی،تاہم نئے کیمروں کی تنصیب کے بعد اب ہر زاویے سے مزارقائد کی سیکیورٹی ونگرانی ممکن ہوسکے گی۔


مذکورہ نئے کیمروں کی تنصیب کے بعد تعداد مزار قائد پر لگنے والے کیمروں کی تعداد 201 تک پہنچ جائے گی، 5 میگا پکسل کے نئے بلٹ کیمروں کی تنصب کا کام شروع کردیا گیا،جوکچھ عرصے میں مکمل کردیا جائےگا۔

مزارقائد کےریذیڈنٹ انجینئرمزارقائد عبدالعلیم شیخ کے مطابق نئے کیمروں کی تنصیب کے ذریعے سکیورٹی کومزید بہتر بنانے میں مدد ملے گی، مزار قائد پر نصب ہونے والے جدید بلٹ کیمرے 5 میگا جبکہ ڈوم اورمنی ڈوم کیمرے 4 میگاپکسل کےحامل ہیں،کیمروں میں چارمیگا پکسل کے ڈوم اور منی ڈوم کیمرے بھی شامل ہیں،جبکہ کیمروں کےساتھ منسلک ڈی وی آر، ہارڈ ڈسک سمیت دیگرآلات بھی تبدیل کیے جارہے ہیں۔

مزارقائد انتظامیہ کے مطابق کیمروں سے منسلک مانیٹرنگ روم میں مزارقائد سیکیورٹی کے علاوہ دیگر قانون نافذکرنے والے اداروں کے اہل کار چوبیس گھنٹے نگرانی پر مامورہتے ہیں۔ مزارکے دوگیٹس باب ایمان(وی آئی پی گیٹ)،باب اتحاد(نمائش گیٹ) پر وفود اورشہریوں کی آمدروفت کے لیے استعمال کیے جاتے ہیں، جس کے لیے 7 واک تھروگیٹس استعمال کیے جاتے تھے، جن میں اب اضافہ کر کے انہیں 9 تک کیا جارہا ہے، کیونکہ عموما قومی دنوں پر مزارقائد پرع شہریوں کا رش بڑھ جاتا ہے،ان نئے اوراضافی گیٹس کی تنصیب سے مزارقائد آنے والے افراد کی بہتراندازمیں اسکریننگ بھی ممکن ہوسکے گی۔