پاکستان اورروس کے درمیان ریلوے کی اپ گریڈیشن کا معاہدہ

مفاہمت پر دستخط پاکستانی سفیر خالد جمالی اور روسی ڈپٹی ٹرانسپورٹ منسٹر نے کیے

Numainda Express June 08, 2024

مفاہمت پر دستخط پاکستانی سفیر خالد جمالی اور روسی ڈپٹی ٹرانسپورٹ منسٹر نے کیے۔ فوٹو: فائل

پاکستان اور روس کے درمیان سینٹ پیٹرزبرگ انٹرنیشنل اکنامک فورم (ایس پی آئی ای ایف ) میں ریلوے میں تعاون کے معاہدے پر دستخط کردیے گئے۔

پاکستانی سفارتخانے اور روس کی جانب سے جاری تفصیلات کے مطابق 27ویں سینٹ پیٹرزبرگ انٹرنیشنل اکنامک فورم (ایس پی آئی ای ایف ) کے موقع پر پاکستان اور روس نے7 جون 2024 کو ریلوے کے شعبے میں تعاون کے حوالے سے مفاہمت کی ایک یادداشت پر دستخط کیے۔

اس مفاہمت نامے کے ذریعے، دونوں ممالک کا مقصد ریلوے کی اپ گریڈیشن کے منصوبوں اور اس اہم شعبے کے جدید خطوط پر استوار کرنے کے مواقع تلاش کرنا اور اس میں تعاون کرنا ہے۔

اس ایم او یو کے تحت اس شعبے میں کام کرنے والی متعلقہ کمپنیوں کے درمیان مستقبل میں تعاون بھی ہوگا جبکہ اس کا مقصد بین الاقوامی کارگو ٹرانسپورٹ کو فروغ دینا اور سہولت فراہم کرنا ہے۔