کراچی کے علاقے قائد آباد میں رینجرز کی کارروائی 2 مبینہ دہشت گرد گرفتار

دہشت گردوں کے دیگر ساتھیوں کی گرفتاری کیلئے بھی چھاپے مارے جارہے ہیں، رینجرز فوٹو: فائل

---

رینجرز نے قائد آباد میں ٹارگٹڈ آپریشن کرکے 2 مبینہ دہشت گردوں کو گرفتار کرلیا جن کے قبضے سے دھماکا خیز مواد بھی برآمد کیا گیا ہے۔

ترجمان رینجرز کے مطابق رینجرز نے کراچی کے علاقے قائد آباد مسلم کالونی میں ٹارگٹڈ آپریشن کرکے 2 مبینہ دہشت گردوں کو گرفتار کرلیا جن کے قبضے سے موٹرسائیکل اور دھماکا خیز مواد بھی برآمد کیا گیا ہے جبکہ ملزمان کا تعلق کالعدم تحریک طالبان پاکستان سے ہے۔

ترجمان رینجرز کا کہنا تھا کہ گرفتار دہشت گرد موٹرسائیکلوں میں دھماکا خیز مواد نصب کررہے تھے اور انہوں نے چھاپے کے دوران فرارہونے کی کوشش کی تاہم مقابلے کے بعد انہیں گرفتار کرلیا گیا جبکہ دہشت گردوں کے دیگر ساتھیوں کی گرفتاری کے لئے بھی چھاپے مارے جارہے ہیں۔