وزیر داخلہ محسن نقوی کی جمعیت علما اسلام کے سربراہ مولانا فضل الرحمان اور صدر مملکت آصف علی زرداری سے اہم ملاقات ہوئی ہے۔
تفصیلات کے مطابق وزیر داخلہ محسن نقوی کی اسلام آباد میں مولانا فضل الرحمان سے ملاقات ہوئی جہاں آمد پر جے یو آئی کے سربراہ نے وزیر داخلہ کا استقبال کیا۔
محسن نقوی نے مولانا فضل الرحمان کی عیادت کی اور خیریت دریافت کرتے ہوئے اُن کے لیے نیک خواہشات کا اظہار کیا۔ وزیر داخلہ کا کہنا تھا کہ ہمارے درمیان 25 سال پرانا دیرینہ تعلق اور احترام کا رشتہ ہے۔
بعد ازاں وزیر داخلہ محسن نقوی اور صدر مملکت آصف علی زرداری کے درمیان ملاقات ہوئی جس میں باہمی دلچسپی کے امور اور ملکی صورتحال پر تفصیلی تبادلہ خیال کیا گیا۔
ایکسپریس نیوز کے مطابق وزیر داخلہ محسن نقوی ایوان صدر پہنچے جہاں انہوں ںے صدر پاکستان آصف علی زرداری سے ملاقات کی۔ ملاقات میں باہمی دلچسپی کے امور اور ملکی صورتحال پر تفصیلی تبادلہ خیال کیا گیا۔
صدر آصف زرداری نے کہا کہ پاکستان کو آگے لے کر جانا ہے اور اس سلسلے میں سب کو اپنا کردار ادا کرنا ہوگا، سیاسی جماعتوں کو جمہوری اور آئینی ذمہ داری نبھانے ہوئے وطن عزیز کی ترقی و خوشحالی کو مقدم رکھنا ہے۔
آصف علی زرداری نے کہا کہ ذاتی اختلافات کو پس پشت ڈال کر صرف اور صرف پاکستان کا سوچنا ہے۔
محسن نقوی نے کہا کہ اتحاد اور یکجہتی کی طاقت سے ہر چیلنج سے نمٹا جا سکتا ہے۔