پنجابی سپر اسٹار دلجیت دوسانج کی جمی فالن کے پروگرام میں ’تاریخی پرفارمنس‘

 نیویارک: بالی وڈ کے سپر اسٹار گلوکار اور اداکار دلجیت دوسانج نے امریکی ہوسٹ اور کامیڈین جمی فالن کے مشہور پروگرام ’دی ٹونائٹ شو‘ میں تاریخی پرفارمنس دی ہے۔

امریکا کے مشہور شو میں پنجابی گلوکار کی پرفارمنس کے حوالے سے خبریں پچھلے دنوں منظر عام پر آئی تھیں اور مداح اس پر بہت پرجوش تھے۔

جمی فالن نے دلجیت دوسانج کا تعارف ’زمین پر سب سے بڑے پنجابی فنکار‘ کے لفظوں سے کرایا اور ان کی پرفارمنس سے بہت متاثر ہوئے۔

دلجیت دوسانج نے اس موقع پر اپنے دو گانے ’بورن ٹو شائن‘ اور ’گوٹ‘ پیش کیے اور اس موقع پر انہوں نے اپنا روایتی پنجابی لباس پہنا ہوا تھا۔

واضح رہے کہ دلجیت دوسانج گلوکاری اور ادکاری دونوں میدان میں اپنی صلاحیتوں کا لوہا منوا کر متعدد عالمی ریکارڈز اپنے نام کرچکے ہیں اور دنیا بھر میں کروڑوں لوگ ان سے محبت کرتے ہیں۔