فٹبال ورلڈ کپ یوروگوئے کے لوئس سوریز نے مخالف کھلاڑی کے کندھے پر کاٹ لیا

لوئس سوریز اس سے پہلے بھی مخالف ٹیم کے کھلاڑیوں کو کاٹنے پر 2 بار پابندی کا سامنا کرچکے ہیں۔ فوٹو؛ اے ایف پی

---

HYDERABAD: برازیل میں جاری قٹبال ورلڈ کپ کے ایک میچ کے دوران یوروگوئے کے نامور اسٹرائیکر لوئس سوریز نے اٹلی کے کھلاڑی کے کندھے پر اپنے دانت گاڑھ دیئے۔

غیر ملکی خبر رساں ادارے کے مطابق گزشتہ روز یوروگوئے اور اٹلی کے میچ کے دوران اس وقت دلچسپ صورت حال پیدا ہو گئی جب اٹلی کے کھلاڑی جارجیو چلینی نے ریفری کو اپنا کندھا دکھاتے ھوئے بتایا کہ لوئس سوریز نے ان کے کندھے پر چک کاٹ دیا ہے۔

فٹبال کی عالمی تنظیم (فیفا) نے واقعہ کی تحقیقات کا آغاز کر دیا ہے۔ فیفا حکام کا کہنا ہے کہ اگر لوئس سوریز پر مخالف کھلاڑی کو کاٹنے کا الزام ثابت ہو جاتا ہے تو انھیں ورلڈ کپ کے دیگر میچز میں پابندی کا سامنا کرنا پڑ سکتا ہے جب کہ انھیں اپنے کلب کی جانب سے بھی سزا ہو سکتی ہے۔

واضح رہے کہ لوئس سوریز اس سے پہلے بھی مخالف ٹیم کے کھلاڑیوں کو کاٹنے پر 2 بار پابندی کا سامنا کرچکے ہیں۔ یوروگوئے نے میچ میں اٹلی کو ایک کے مقابلے میں صفر گول سے شکست دے کر پری کوارٹر فائنل میں اپنی جگہ بنا لی ہے۔