پاکستان عوامی تحریک کے سربراہ ڈاکٹر طاہرالقادری کا کہنا ہے کہ سانحہ ماڈل ٹاؤن پر کسی کو معاف نہیں کیا جائے گا بلکہ ایک ایک گولی کا حساب ہوگا۔
ایکسپریس نیوز کے مطابق ڈاکٹر طاہر القادری کا کہنا تھا کہ پنجاب حکومت کی جانب سے ظلم و بربریت اور دہشت گردی کا انتقام انقلاب ہوگا اور انقلاب رواں سال ہی آئے گا، نئے نظام انقلاب کے تحت حکومت سے بدلہ لیں گے اور آئی جی سے پولیس اہلکار تک ہر کسی کو پکڑیں گے۔ انہوں نے کہا کہ سانحہ ماڈل ٹاؤن پرپنجاب حکومت کے کسی ادارے یا کمیشن پر یقین نہیں رکھتے، جب تک نواز شریف اور شہباز شریف اقتدار میں ہیں کوئی انکوائری نہیں ہوسکتی۔
سربراہ عوامی تحریک کا کہنا تھا کہ انقلاب لائے بغیر وہ ملک چھوڑ کر نہیں جائیں گے اور ملک میں انقلاب تک یہیں رہیں گے، انہوں نے پنجاب پولیس کو مخاطب کرتے ہوئے کہا کہ پولیس اہلکار استعفے دے دیں اور وردیاں پھینک دیں،حکمرانوں کو ایک ایک گولی کا حساب دینا ہوگا۔ ان کا کہنا تھا قوم موجودہ دور کے ہٹلر اور مسولینی کی غلط معلومات پر کان نہ دھریں اور انقلاب کے لئے تیار ہوجائیں۔