وزیراعلیٰ سندھ صوبے پر واجب الادا بجلی کے بل ادا کریں عابد شیر علی

وزیرمملکت برائے پانی و بجلی عابد شیر علی نے کہا ہے کہ وزیراعلیٰ سندھ واسا سمیت صوبے کے تمام سرکاری محکموں پر واجب الادا بجلی کے بل ادا کریں۔


حیدرآباد میں میڈیا سے بات کرتے ہوئے عابدشیر علی نے کہا کہ وفاق کراچی کو طے شدہ معاہدے کے تحت پوری بجلی فراہم کررہا ہے لیکن سندھ کی جانب سے بلوں کی ادائیگی نہیں کی جارہی لہٰذا وزیراعلیٰ سندھ قائم علی شاہ واسا سمیت تمام سرکاری محکموں پر واجب الادا بجلی کے بل ادا کریں۔ انہوں نے کہا کہ ہم چاہتے تو خیبر پختونخوا میں حکومت بنالیتے لیکن مسلم لیگ (ن) نے عمران خان کو موقع دیا لہذٰا اب وہ صوبے کے عوام کے لئے کچھ کرکے دکھائیں۔

عابد شیر علی کا کہنا تھا کہ عمران خان الیکشن کا رونا روتے رہتے ہیں جبکہ الیکشن کو ایک سال ہوگیا ہے،ہماری حکومت کے خلاف سازشوں میں مصروف جماعتیں سازشی محل بنائیں لیکن آئی ڈی پیز کے لئے بھی کچھ کرکے دکھایا جائے۔