پی سی بی کی این او سی پالیسی مزید سخت ہوگئی

 لاہور: ٹی20 ورلڈ کپ میں قومی ٹیم کی مایوس کن کارکردگی کے بعدکھلاڑیوں کے گرد گھیرا تنگ کردیا گیا، پی سی بی نے این او سی کی پالیسی کومزید سخت کرتے ہوئے صائم ایوب اور اعظم خان کو سی پی ایل کھیلنے سے روک دیا، دونوں کھلاڑی امریکا اور ویسٹ انڈیز میں منعقدہ ٹوئنٹی20 ورلڈکپ اسکواڈ کا حصہ تھے۔

تفصیلات کے مطابق پاکستان کرکٹ بورڈنے کی این او سی پالیسی قومی اور عالمی سطح کے کنٹریکٹ یافتہ کھلاڑیوں کو سالانہ 2 سے زیادہ بیرون ملک لیگز میں شرکت سے روکتی ہے،اس کا مقصد کھلاڑیوں پر کام کے بوجھ کو کم رکھنا اورقومی ڈیوٹی کو ترجیح دینا ہے۔

اسی کی روشنی میں حکام نے کیریبیئن پریمیئر لیگ ٹیموں کی جانب سے برقرار رکھے جانے کے باوجود حالیہ ورلڈ کپ میں قومی اسکواڈ کا حصہ بننے والے اعظم خان اور صائم ایوب کے این او سی روک دیے ہیں،ایونٹ آئندہ ماہ ہوگا۔

یہ بھی پڑھیں: پی سی بی گورننگ بورڈ کا 6 جولائی کو اہم اجلاس، بجٹ منظور کیا جائے گا

ذرائع کے مطابق معاہدے کی رو سے پی سی بی سینٹرل کنٹریکٹ یافتہ کسی بھی کھلاڑی کی این او سی کیلیے درخواستوں کو مسترد کرنے کا حق محفوظ رکھتا ہے،اس سے دیگر کو بھی یہ واضح  پیغام دیا گیا ہے۔

حال ہی میں لیگ اسپنر اسامہ میر کو بتایا گیا کہ انھوں نے سال کے لیے 2 لیگز کا اپنا کوٹہ ختم کر دیا ہے،انھوں نے دلیل دی کہ چونکہ وہ اس وقت پاکستان ٹیم کا حصہ نہیں لہذا انگلینڈ میں کھیلنے کی اجازت دی جانی چاہیے تاہم انھیں بتایا گیا کہ یہ فیصلہ بورڈ کو کرنا ہے۔

مزید معلوم ہوا ہے کہ پی سی بی حکام نے اپنے فیصلے سے دیگر بورڈز اور ٹی 20 لیگز فرنچائزز کو آگاہ کردیا ، انھیں بورڈ کی جانب سے جاری کردہ این او سی کے بغیر پاکستانی کھلاڑیوں کو شامل کرنے سے خبردارکیا گیا ہے،یاد رہے پاکستانی ٹیسٹ ٹیم اب آئندہ ماہ بنگلہ دیش سے ہوم سیریز کھیلے گی۔