پنجاب فوڈ اتھارٹی قوانین میں ترمیم کا فیصلہ ملاوٹ ناقابل ضمانت جرم ہوگا

پنجاب میں فوڈ اتھارٹی قوانین میں ترمیم کا فیصلہ کیا گیا ہے، جس کے نافذ ہونے سے ملاوٹ کرنا ناقابل ضمانت جرم تصور ہوگا۔

صوبے بھر میں صحتمند خوراک کی فراہمی اور ملاوٹ کے خاتمے کے لیے پنجاب فوڈ اتھارٹی قوانین میں ترمیم کا فیصلہ کیا گیا ہے، اس حوالے سے پنجاب فوڈ اتھارٹی نے ایکٹ بنانا شروع کردیا ہے، جس کے مطابق کھانے پینے کی اشیا میں ملاوٹ کرنا ناقابل ضمانت جرم ہوگا۔

ڈی جی فوڈ اتھارٹی عاصم جاوید کے مطابق ملاوٹ کرنے والوں کو سزائیں اور جرمانہ بڑھانے کی تجویز ہے۔ قانونی سقم کے باعث ملاوٹ مافیا بچ جاتا ہے، جس میں ترمیم کرکے ان کا خاتمہ کیا جائے گا۔ ملاوٹ کے باوجود لوگ عدالتوں سے بری ہوجاتے ہیں، ملاوٹ کے خاتمے کے لیے ترمیم لارہے ہیں۔

انہوں نے بتایا کہ یکم جنوری2023سے لے کر 30جون2024 تک ملاوٹ کرنے والوں کے خلاف1023کیسز دائر ہوئے۔ ملاوٹ کے 850کیسز پولیس اسٹیشن اور عدالتوں میں زیرالتوا ہیں جب کہ صرف78افراد کو سزائیں ہوسکی ہیں۔ نئے قانون کے مطابق ملاوٹ کرنا ناقابل ضمانت جرم ہوگا۔