شہر قائد میں دو مبینہ پولیس مقابلے، 2 زخمی سمیت 4 ڈاکو گرفتار

گرفتار ملزمان سے ایک نائن ایم ایم پستول بمعہ گولیاں، موبائل فونز، نقدی اور موٹرسائیکل برآمد کی گئی

اسٹاف رپورٹر جمعرات 4 جولائی 2024

(فوٹو: فائل)

کراچی: نیو کراچی اور زمان ٹاؤن پولیس نے مبینہ مقابلوں کے بعد 2 زخمی سمیت 4 ڈاکوؤں کو گرفتار کر کے اسلحہ اور لوٹا ہوا دیگر سامان برآمد کر لیا۔

تفصیلات کے مطابق نیو کراچی پولیس نے بدھ اور جمعرات کی درمیانی شب سیکٹر 11 اے حافظ جی مزار والی سڑک سے مبینہ مقابلے کے بعد ایک زخمی سمیت 3 ڈاکوؤں گرفتار کر لیا، زخمی حالت میں گرفتار ملزم کو طبی امداد کے لیے عباسی شہید اسپتال منتقل کیا گیا۔

ترجمان کراچی پولیس کے مطابق زخمی حالت میں گرفتار ملزم کی شناخت علی حیدر ولد ذیشان کے نام سے کی گئی جبکہ گرفتار دیگر دو ملزمان نے اپنے نام عمران اور مزمل بتائے ہیں۔

گرفتار ملزمان سے ایک نائن ایم ایم پستول بمعہ گولیاں، موبائل فونز، نقدی اور موٹرسائیکل برآمد کی گئی۔

زمان ٹٓاؤن پولیس نے بدھ اور جمعرات کی درمیانی شب کورنگی کراسنگ کے قریب سے مبینہ مقابلے کے بعد ایک ڈاکو کو زخمی حالت میں گرفتار کر لیا ، زخمی حالت میں گرفتار ملزم کو طبی امداد کے لیے جناح اسپتال لے جایا گیا، ترجمان کراچی پولیس کے مطابق زخمی حالت میں گرفتار ملزم کی شناخت 20 سالہ عرفان ولد محمد بخش کے نام سے کی گئی۔

گرفتار ملزم کا ساتھی موقع سے فرار ہونے میں کامیاب ہوگیا، پولیس نے گرفتار ملزم سے ایک پستول بمعہ گولیاں، چھینا گیا موبائل فون اور نقدی برآمد کر لی۔