لیجنڈز موجودہ کھلاڑیوں سے زیادہ فٹ ہیں یونس کا موقف آگیا

شکست خوردہ ٹیم پر ملبہ گرانا آسان ہوتا ہے، سابق کپتان (فوٹو: ایکسپریس ویب)

---

ورلڈ چیمپئین شپ آف لیجنڈز ٹورنامنٹ میں پاکستانی ٹیم کی قیادت کرنیوالے قومی ٹیم کے کپتان یونس خان نے ریٹائرڈ کرکٹرز کے قومی ٹیم کے کھلاڑیوں سے زیادہ فٹ ہونے کے دعویٰ کو مسترد کردیا۔

گزشتہ روز ایجبسٹن کرکٹ اسٹیڈیم میں کھیلے گئے معرکے میں روایتی حریف بھارت کو شکست دینے کے بعد کپتان یونس خان سے میڈیا گفتگو کے دوران صحافی نے سوال کیا کہ ریٹائرڈ کرکٹرز پر مشتمل پاکستان چیمپئنز کی موجودہ کرکٹرز سے زیادہ فٹ نظر آتی ہے؟۔

مزید پڑھیں: ٹی20 ورلڈکپ میں ناقص کارکردگی؛ لیجنڈز نے فینز کو خوش کرنے کا بیٹرا اٹھالیا

جس پر یونس خان نے جواب دیا کہ ایسا نہیں! ہماری موجودہ ٹیم بہت فٹ ہے، جب کوئی ٹیم نہیں جیتتی تو ایسی باتیں کہی جاتی ہیں اور شکست خوردہ ٹیم پر ملبہ گرانا آسان ہوتا ہے، یہی وجہ ہے کہ لوگ لیجنڈز کی پرفارمنس کو دیکھ کر خوش ہیں اور ہمارے بارے میں مثبت بات کر رہے ہیں۔

مزید پڑھیں: ورلڈ چیمپئین شپ آف لیجنڈز؛ آفریدی، اجے دیوگن کی ملاقات، ویڈیو وائرل

انہوں نے کہا کہ ان کا مقصد ٹورنامنٹ جیتنا اور اپنے مداحوں کو خوش کرنا ہے، حالیہ ورلڈکپ میں پاکستانی ٹیم کی خراب کارکردگی کے بعد بہت سے شائقین مایوس ہیں، جنہیں ہم دوبارہ کھیل کی طرف راغب کرنے کی کوشش کررہے ہیں۔

مزید پڑھیں: لیجنڈز لیگ؛ پاکستان کی پوائنٹس ٹیبل پر کیا پوزیشن ہے؟

واضح رہے کہ گزشتہ روز پاکستان چیمپیئنز نے ٹورنامنٹ میں اپنی مسلسل تیسری فتح حاصل کی تھی، روایتی حریف بھارت کو 68 رنز کے بڑے مارجن سے شکست دیکر قومی ٹیم ٹورنامنٹ کی پوائنٹس ٹیبل پر پہلی پوزیشن حاصل کرچکی ہے۔