تازہ ترین

نعمان اعجاز نے خلیل الرحمٰن کو 'احمق' قرار دیدیا

اللہ تعالیٰ! ایسے لوگوں کو ہدایت دے، سینیئر اداکار

ویب ڈیسک بدھ 10 جولائی 2024

نعمان اعجاز نے ڈھکے چُھپے الفاظ میں خلیل الرحمٰن قمر پر تنقید کردی : فوٹو : ویب ڈیسک

پاکستانی شوبز انڈسٹری کے سینیئر اداکار نعمان اعجاز نے ڈھکے چُھپے الفاظ میں ڈرامہ نگار خلیل الرحمٰن قمر پر تنقید کردی۔

نعمان اعجاز نے اپنے آفیشل انسٹاگرام ہینڈل پر اپنی سیلفی پوسٹ کی جس میں وہ مُسکرا رہے تھے، اداکار نے اپنی تصویر کے ساتھ ایک مبہم کیپشن بھی لکھا۔

اداکار نے اپنے مداحوں سے مخاطب ہوتے ہوئے کہا کہ آئیے! ایسے احمقوں کو مشہور کرنا چھوڑ دیں جنہیں یہ بھی نہیں معلوم کہ کسی سے اختلاف کرنا قابلِ قبول ہے لیکن کسی کی بےعزتی کرنا ناقابلِ قبول ہے۔

اُنہوں نے کہا کہ ایسے لوگوں کے پاس اختلاف کی کوئی ٹھوس وجہ نہیں ہوتی اور وہ بس اونچی آواز میں بول کر جواز پیش کرنے کی کوشش کرتے ہیں۔

نعمان اعجاز نے مزید کہا کہ میری دُعا ہے کہ اللہ تعالیٰ! ایسے لوگوں کو ہدایت دے، آمین۔

اداکار نے اپنی پوسٹ میں خلیل الرحمٰن قمر کا نام نہیں لیا لیکن اُن کی یہ پوسٹ ڈرامہ نگار کے حالیہ انٹرویو کے بعد ہی سامنے آئی ہے۔

واضح رہے کہ گزشتہ دنوں نجی ٹی وی چینل کو دیے گئے انٹرویو میں خلیل الرحمٰن قمر نے کہا تھا کہ نعمان اعجاز ایک گھٹیا آدمی ہیں، پوری دنیا میں صرف نعمان اعجاز ہیں جن سے اُنہیں نفرت ہے باقی لوگوں پر غصہ آتا ہے لیکن نفرت کسی سے نہیں ہے۔