پی ٹی آئی نے شیر افضل مروت کی بنیادی رکنیت معطل کردی
عمران خان کی ہدایت پر شیر افضل مروت کے خلاف ایکشن لیا گیا ہے، سیکریٹری جنرل پی ٹی آئی عمر ایوب
پاکستان تحریک انصاف کی قیادت نے شیر افضل مروت کی بنیادی پارٹی رکنیت معطل کردی۔
تفصیلات کے مطابق پاکستان تحریک انصاف کے سیکریٹری جنرل عمر ایوب کی جانب سے شیر افضل کی بنیادی رکنیت معطل کرنے کا نوٹی فکیشن جاری کیا گیا، جس میں بتایا گیا ہے کہ پارٹی نظم و ضبط کی خلاف ورزی پر شیر افضل مروت کے خلاف ایکشن لیا گیا ہے۔
اعلامیے میں کہا گیا ہے کہ شیر افضل مروت کی پارٹی ڈسپلن کی خلاف ورزی سے متعلق انکوائری کمیٹی تشکیل دی گئی ہے۔ جس میں مرکزی ترجمان رؤف حسن، بریگیڈیئر (ر) مصدق ملک، فردوس شمیم نقوی اور داؤد خان کاکڑ شامل ہیں۔
اعلامیے میں لکھا گیا ہے کہ شیر افضل مروت کے بیانات اور اقدامات کی وجہ سے پارٹی کو شدید نقصان پہنچا جبکہ انہیں پہلے ہی سیاسی اور کور کمیٹی سے ہٹادیا گیا تھا۔ اعلامیے میں کہا گیا ہے کہ عمران خان کی ہدایت پر شیر افضل مروت کے خلاف ایکشن لیا گیا ہے۔
ذرائع کا کہنا ہے کہ ایک روز قبل پاکستان تحریک انصاف کے بانی چیئرمین نے شیر افضل مروت کی بنیادی رکنیت ختم کرنے کا حکم دیا تھا۔ واضح رہے کہ شیر افضل مروت نے پارٹی قیادت سے اختلاف کرتے ہوئے بیانات دیے جس پر انہیں شوکاز نوٹس بھی جاری کیا گیا تھا۔
شیر افضل مروت نے یہ بھی الزام عائد کیا تھا کہ پارٹی قائدین اُن کی اڈیالہ جیل میں عمران خان سے ملاقات نہیں کرواتے تاہم عمران خان سے جب صحافی نے اس بابت سوال کیا تو انہوں نے کوئی جواب نہیں دیا تھا۔