اسلام آباد میں 26جولائی کو دھرنا آج ملک بھر میں احتجاج ہوگا حافظ نعیم الرحمان

حکمران آئی ایم ایف کے حکم پر بجلی کے بلوں میں اضافہ کر رہے ہیں اور پیٹرول کی قیمت بھی بڑھا رہے ہیں، امیر جماعت اسلامی

ویب ڈیسک July 14, 2024

حافظ نعیم نے کہا کہ عوامی حقوق کے تحفظ کے لیے احتجاج بھی کریں گے اور عدالتوں میں بھی جائیں گے—فوٹو: فائل

جماعت اسلامی پاکستان کے امیر حافظ نعیم الرحمان نے ملک میں مہنگائی کے حوالے سے حکومت پر تنقید کرتے ہوئے اعلان کیا ہے کہ آج ملک بھر میں احتجاج اور 26 جولائی کو اسلام آباد میں تاریخی دھرنا ہوگا۔

حافظ نعیم الرحمان نے بیان میں کہا کہ مخصوص نشستوں پر سپریم کورٹ کے فیصلے کا خیر مقدم کرتے ہیں، سپریم کورٹ ایک جوڈیشل کمیشن بنائے جو فارم 45کی بنیاد پر ہر سیٹ کا فیصلہ کرے۔

انہوں نے کہا کہ عدالت عظمیٰ کے فیصلے کے بعد الیکشن کمیشن کی کوئی اخلاقی حیثیت باقی نہیں رہی، نتخابات میں دھاندلی کے الزامات لگانے والی پارٹیوں نے مخصوص نشستیں لے لیں۔

امیر جماعت اسلامی کا کہنا تھا کہ حکمران عالمی مالیاتی ادارہ (آئی ایم ایف) کے حکم پر بجلی کے بلوں میں اضافہ کر رہے ہیں، حکمران اشرافیہ ظالمانہ ٹیکس اور پیٹرول کی قیمتوں میں بھی ہوشربا اضافہ کر رہی ہے۔

انہوں نے کہا کہ 14آج ملک بھر میں احتجاج اور دھرنے ہوں گے، عوام دشمن اقدامات کے خلاف "حق دو عوام کو" تحریک چلارہے ہیں، عوامی حقوق کے لیے سڑکوں پر بھی نکلیں گے اور عدالتوں میں بھی جائیں گے۔

حافظ نعیم الرحمان کا کہنا تھا کہ 26 جولائی کو اسلام آباد میں عظیم الشان اور تاریخی دھرنا ہوگا۔