قاتلانہ حملے کے بعد ٹرمپ کی مقبولیت اور حمایت میں اضافہ

مباحثے میں جوبائیڈن کو چت کرنے والے پر ڈونلڈ ٹرمپ کو حاصل ہونے والی سبقت قاتلانہ حملے کے بعد مزید مستحکم ہوگئی

ویب ڈیسک July 14, 2024

مباحثے میں جوبائیڈن کو چت کرنے والے پر ڈونلڈ ٹرمپ کو حاصل ہونے والی سبقت قاتلانہ حملے کے بعد مزید مستحکم ہوگئی، فوٹو: فائل

انتخابی ریلی کے دوران حملہ آور کی فائرنگ سے بال بال بچ جانے والی سابق امریکی صدر ڈونلڈ ٹرمپ کے لیے دنیا بھر میں ہمدردی اور ملک گیر مقبولیت میں اضافہ ہوگیا۔

عالمی خبر رساں ادارے کے مطابق ٹرمپ پر ناکام قاتلانہ حملے کی اطلاع ملتے ہی عالمی رہنماؤں کی جانب سے صدر ٹرمپ کی خیریت کی معلومات کے لیے ٹیلی فونز کا تانتا بندھ گیا۔

عالمی رہنماؤں نے حملے کی مذمت کی اور اپنی حمایت کا یقین دلایا۔ امریکی عوام نے بھی اس واقعے پر ڈونلڈ ٹرمپ کے ساتھ ہمدردی کا اظہار کیا ہے جب کہ ان کے حامیوں میں جوش کی نئی لہر دوڑ گئی ہے۔

سوشل میڈیا پر امریکا کے طاقت ور ترین ارب پتی تاجروں اور رہنماؤں کے ساتھ ساتھ عوام نے ٹرمپ کو اپنی حمایت کا یقین دلایا ہے۔ آج ہونے والے متعدد عوامی سروے ٹرمپ کی مقبولیت کے گراف میں اضافہ ظاہر کر رہے ہیں۔

امریکی صدارتی الیکشن میں مباحثے میں جوبائیڈن کو چت کرنے پر ڈونلڈ ٹرمپ کو حاصل ہونے والی سبقت ناکام قاتلانہ حملے کے بعد مزید مستحکم ہوگئی ہے۔

ادھر حکمراں جماعت ڈیموکریٹس پر جوبائیڈن کی بڑھتی عمر، کمزور پڑتی یادداشت اور بھولنے کی بیماری کے باعث نئے امیدوار کو لانے کے لیے دباؤ بڑھتا جارہا ہے۔

دیکھنا یہ ہے کہ ڈیموکریٹس اپنا یہ آخری کارڈ پھینک کر ووٹرز میں نئی روح پھونکنے میں کامیاب ہو پاتے ہیں اور ٹرمپ کی مقبولیت کے سیلاب کا سامنا کرنے کے لیے کیا حکمت عملی اپناتے ہیں۔