ٹی20 ورلڈکپ آئی سی سی کو کتنا نقصان اٹھانا پڑا رپورٹ نے چونکا دیا

میگا ایونٹ سے انٹرنیشنل کرکٹ کونسل کو 167 ملین ڈالر کا دھچکا لگا

ویب ڈیسک July 18, 2024

میگا ایونٹ سے انٹرنیشنل کرکٹ کونسل کو 167 ملین ڈالر کا دھچکا لگا (فوٹو: ایکسپریس ویب)

امریکا اور ویسٹ انڈیز میں ہونے والے ٹی20 ورلڈکپ نے انٹرنیشنل کرکٹ کونسل (آئی سی سی) 167 ملین ڈالر کا نقصان برداشت کرنا پڑا ہے۔

بھارتی میڈیا کی رپورٹس کے مطابق آئی سی سی کے ممبران رواں ماہ سری لنکا میں شیڈول مالی اور آپریشنل معاملات پر بورڈ میٹنگ میں سوالات کریں گے جبکہ امریکا اور ویسٹ انڈیز کی مشترکہ میزبانی میں ہونے والے میگا ایونٹ میں اضافی رقم اور میچز کروانے سے متعلق بھی اہم فیصلے ہوں گے۔

رپورٹس میں دعویٰ کیا گیا ہے کہ ناقص انتظامات اور امریکا میں کرکٹ کے فروغ کی کوششوں کے باعث انٹرنیشنل کرکٹ کونسل (آئی سی سی) کو 167 ملین ڈالر یعنی (46 ارب 50 کروڑ 26 لاکھ سے زائد پاکستانی روپوں) کا نقصان اٹھانا پڑا ہے۔

مزید پڑھیں: ٹی20 ورلڈکپ؛ بدانتظامی، پیسوں کی ہیرا پھیری آئی سی سی ممبران ناراض

آئی سی سی نے اس حوالے سے ایک آزاد کمیٹی قائم کی ہے جو اپنی رپورٹ پیش کرے گی۔

مزید پڑھیں: ٹی20 ورلڈکپ؛ مالی بے ضابطگیوں کے باعث مکمل آڈٹ کروانے کا فیصلہ

رپورٹس میں کہا جارہا ہے کہ کمپنی نے آئی سی سی سے منظور بجٹ کے علاوہ 2 کروڑ ڈالرز کی درخواست کی تھی، بورڈ ڈائریکٹر کا کہنا ہے کہ رقم کیش ادائیگیوں کیلئے بطور لون طلب کی گئی تھی۔