سابق رکن قومی اسمبلی کا نام نیشنل آئیڈینٹیفکیشن لسٹ میں ڈال دیا گیا

سندھ ہائیکورٹ نے تحریک انصاف کے سابق رکن قومی اسمبلی فہیم خان کا نام پاکستان نیشنل آئیڈینٹیفکیشن لسٹ (پی این آئی ایل) میں شامل کرنے کیخلاف درخواست پر وفاقی تحقیقاتی ایجنسی (ایف آئی اے) اور ڈائریکٹر جنرل پاسپورٹ کو نوٹس جاری کردیئے۔


سندھ ہائیکورٹ میں جمعہ کے روز سابق رکن قومی اسمبلی فہیم خان کا نام پی این آئی ایل میں شامل کرنے کیخلاف درخواست کی سماعت ہوئی، درخواست گزار کے وکیل بیرسٹر علی طاہر نے موقف دیا کہ ایف آئی اے نے سابق رکن قومی اسمبلی کانام پی این آئی ایل میں ڈال دیا ہے جبکہ فہیم خان نے تمام مقدمات میں ضمانت حاصل کر رکھی ہے۔

عدالت سے استدعا ہے کہ فہیم خان کا پی این آئی ایل سے نکالنے کا حکم دیا جائے، جس پر عدالت نے ایف آئی اے اور ڈائریکٹر جنرل پاسپورٹ کو نوٹس جاری کرتے ہوئے فریقین سے 7 اگست تک جواب طلب کرلیا۔