خاتون امیدوار کے مدمقابل آنے پر ٹرمپ کا خوشی کا اظہار

جو بائیڈن نے صدارتی دوڑ سے دستبرداری کا اعلان کردیا

ویب ڈیسک July 22, 2024

جو بائیڈن نے صدارتی دوڑ سے دستبرداری کا اعلان کردیا

حکمراں جماعت ڈیموکریٹس کی جانب سے جوبائیڈن کی جگہ نئی امیدوار کملا ہیرس کو ممکنہ طور پر صدارتی انتخاب میں اتارنے کے فیصلے پر مخالف امیدوار ڈونلڈ ٹرمپ کا ردعمل سامنے آگیا۔

عالمی خبررساں ادارے کے مطابق امریکی صدارتی الیکشن میں مضبوط ترین امیدوار کے طور پر سامنے آنے والے ڈونلڈ ٹرمپ نے ڈیمو کریٹس کی نئی امیدوار اور موجودہ نائب صدر کملا ہیرس کا نام سامنے آنے پر مسرت کا اظہار کیا ہے۔

امریکی صدر ڈونلڈ ٹرمپ نے کہا کہ مجھے اس نام پر خوشی ہوئی ہے۔ صدارتی انتخاب میں کملا ہیرس کو ہرانا آسان ہوگا۔ بس فتح اب کچھ دوری پر ہے۔

یاد رہے کہ ڈیموکریٹس کی جانب سے پہلے موجودہ صدر جوبائیڈن بطور صدارتی امیدوار سامنے آئے تھے تاہم بڑھتی ہوئی عمر، کمزور پڑتی یادداشت اور صدارتی مباحثے میں ڈونلڈ ٹرمپ کے مدمقابل غیرمطمئن کارکردگی پر ان سے دستبردار ہونے کے لیے دباؤ تھا۔

صدر جوبائیڈن صدارتی الیکشن کے لیے مُصر رہے تاہم ڈیموکریٹس کے رہنماؤں باراک اوباما، نینسی پلوسی اور دیگر نے انھیں دستبردار ہونے کے لیے راضی کرلیا۔

جو بائیڈن نے صدارتی دوڑ سے دستبرداری کا اعلان کرتے ہوئے موجودہ نائب صدر کملا ہیرس کے نام کی توثیق کی ہے جنھیں دیگر رہنماؤں کی بھی حمایت حاصل ہے۔

اس بات کے قوی امکان ہیں ڈیموکریٹ پارٹی اپنے امیدوار کے لیے کملا ہیرس کے نام کا ہی اعلان کرے گی۔