وزیرخارجہ اسحاق ڈار اور برطانوی وزیرخارجہ کا دو طرفہ تعاون بڑھانے پر اتفاق

نائب وزیراعظم اور وزیر خارجہ اسحاق ڈار اور برطانیہ کے وزیر خارجہ ڈیوڈ لیمی نے اپنے پہلے رابطے میں دو طرفہ تعاون بڑھانے پر اتفاق کرتے ہوئے موسمیاتی تبدیلی سمیت دیگر چیلنجز سے نمٹنے کے لیے مل کر کام کرنے کا اعادہ کیا۔

ترجمان وزارت خارجہ کی جانب سے جاری بیان کے مطابق نائب وزیراعظم اور وزیر خارجہ سینیٹر اسحاق ڈار نے برطانیہ کے نو منتخب سیکریٹری خارجہ برائے خارجہ امور، دولت مشترکہ اور ترقیاتی امور کے ڈیوڈ لیمی سے ٹیلی فون پر بات چیت کی اور انہیں منصب سنبھالنے پر مبارک باد دے دی۔

بیان میں کہا گیا کہ نائب وزیراعظم نے امید ظاہر کی کہ برطانیہ میں نئی حکومت پاکستان اور برطانیہ کے تعلقات میں مثبت رفتار جاری رکھے گی اور دونوں وزرا نے پاکستان اور برطانیہ کے درمیان خوش گوار تعلقات مزید مضبوط بنانے کے لیے برطانوی پاکستانیوں کے مثبت کردار کو سراہا۔


اسحاق ڈار نے دولت مشترکہ کے تناظر سمیت برطانیہ کے ساتھ اپنے تعلقات کو پاکستان کی اہمیت پر زور دیا۔

انہوں نے کہا کہ موسمیاتی تبدیلی سے نمٹنے، نوجوانوں کے لیے مواقع پیدا کرنے، تجارت اور سرمایہ کاری کو فروغ دینے پر سیکریٹری خارجہ لیمی کے ساتھ کام کرنے کے منتظر ہیں۔

دفترخارجہ کے بیان کے مطابق برطانوی سیکریٹری خارجہ لیمی نے اپنی مدت کے دوران پاکستان کے لیے برطانیہ کی حمایت کا اعادہ کیا۔

دونوں ممالک کے وزرائے خارجہ نے دوطرفہ تعاون بڑھانے اور اکتوبر میں دولت مشترکہ کے سربراہان حکومت کے اجلاس میں مصروف رہنے کے لیے مل کر کام کرنے پر اتفاق کیا۔