9 مئی کے ملزمان کو ریلیف مل رہا ہے مریم اورنگزیب

بانی پی ٹی آئی نے اعتراف کرلیا 9 مئی کی کال انہوں نے دی تھی،مریم اورنگزیب:فوٹو:فائل

---

پنجاب کی سینئر وزیر اور ن لیگ کی مرکزی ترجمان مریم اورنگزیب کا کہنا ہے کہ 9 مئی کے ملزمان کو ریلیف مل رہا ہے۔

مریم اورنگزیب نے لاہور میں پریس کانفرنس سے خطاب میں کہا کہ اگر 9 مئی کے ذمہ داروں پر پاکستان کا آئین اور قانون لاگو نہیں ہوتا تو پھر کسی شخص پربھی قانون لاگو نہیں ہوتا۔ چئیرمین پی ٹی آئی نے اعتراف کرلیا ہے کہ میں بھی ڈیجیٹل دہشت گرد ہوں۔

سینئر وزیر پنجاب کا مزید کہنا تھا کہ یہ ریاست کو مانتے ہی نہیں اس لیے ریاستی اداروں پر حملہ آور ہوتے ہیں۔ سیاست کو اس گند سے صاف کرنا پڑے گا۔ اعلیٰ عدلیہ سے گزارش کرتی ہوں کہ آپ کو مجرم کو سزا دینا پڑے گی ورنہ کل دہشت گردوں کو بھی سرٹیفکیٹ دینا پڑے گا۔ یہ معاملہ سیاسی نہیں ریاستی ہے۔

مریم اورنگزیب کا مزید کہنا تھا کہ بانی پی ٹی آئی نے اعتراف کیا کہ 9 مئی کی کال میں نے دی تھی۔ اس کے ثبوت عوام نے ٹی وی اسکرین پر دیکھے۔ ایک شخص نے 2014 میں ریاستی چڑھائی کی ملک پر حملہ کیا۔ ملک کو جلانے کی تاریخیں دی جاتی رہیں۔ ہم نے کبھی جنگی حالات میں پی ٹی وی کی ٹرانسمیشن بند نہیں دیکھیں۔ یہ منصوبہ بندی کے تحت 2014 سےریاستی اداروں پرحملے کررہے ہیں۔ اب ان کو سزا دینے کا وقت ہے۔ انتشاری ٹولہ تیز ہوگیا ہے کیونکہ ملک ترقی کی راہ پر گامزن ہورہا ہے۔