حکومت کی پی ٹی آئی کو ایک بار پھر مذاکرات کی پیش کش

آئیں مل کر بیٹھیں، بات کرتے ہیں، معاملات کو سلجھاتے ہیں، ہمیں ہٹانا ہے ہٹادیں، وزیر پٹرولیم

ویب ڈیسک July 27, 2024

ملک ایسے ہی چلتا رہا تو برباد ہوجائے گا،وزیر پٹرولیم

حکومت نے پی ٹی آئی کو مذاکرات کی پیشکش کردی۔

وفاقی وزیر پٹرولیم مصدق ملک نے اسلام آباد میں پریس کانفرنس میں پی ٹی آئی کو مذاکرات کی پیشکش کرتے ہوئے کہا کہ ہم کہتے ہیں آئیں مل کر بیٹھیں ، بات کرتے ہیں، معاملات کو سلجھاتے ہیں۔

وزیر پٹرولیم نے کہا کہ وزیراعظم شہبازشریف کے ذہن میں صرف 3چیزیں ہیں، اولین ترجیح غریب کے بچے کو روزگار دینا ہے ، دوسرا مہنگائی کے بوجھ کو ختم کرنا ہے اور تیسرا غربت کو ختم کرنا ہے۔

ان کا کہنا تھا کہ عوام کو معلوم ہے کس نے کیا کیا ہے؟ آج تک کسی کے منہ سے سنا ہے مہنگائی کو کیسے ختم کریں گے؟ پچھلے دنوں ٹرینڈ چلا تھا کپتان نہیں تو پاکستان نہیں، ملک دشمن عناصر ترقی میں رکاوٹیں کھڑے کررہے ہیں ، پاکستان ہے توہم سب ہیں ، بانی پی ٹی آئی کہتے ہیں ن لیگ اسٹیبلشمنٹ سے ہماری لڑائی کرارہی ہے۔

مصدق ملک نے کہا کہ بات کرو لیکن برباد مت کرو، ملک کو الجھاؤ نہیں بلکہ سلجھاؤ، ہم نے کہا آؤ حکومت بنائیں آپ کہتے ہیں ہم نہیں بنائیں گے، آج آپ اُدھم مچارہے، آپ اپنے بچوں کے مستقبل کے ساتھ ظلم کررہے ہیں ، ہمیں ہٹانا ہے ہٹادیں ، مگر ملک ایسے ہی چلتا رہا تو برباد ہوجائے گا۔